יעצט פרייטאג נאכמיטאג איז באשטעטיגט געווארן אז די גרויסע חתונה בחצר הקודש וויזניץ וואס קומט פאר דעם קומענדיגן דינסטאג הבעל"ט, וועט געפראוועט ווערן אויף א ריזיגע פארנעם אין די גרויסע זאל היכל ראזענבערג אין קרית צאנז נתני'.
די רעדע איז פון די שמחת החתונה פון א אייניקל ביי כ"ק אדמו"ר מוויזניץ שליט"א, די כלה א טאכטער פון בנו יחידו הגה"צ ר' חיים מאיר האגער שליט"א, איידעם ביי כ"ק אדמו"ר מספינקא שליט"א, מיט די חתן א זון פון הגה"צ אבד"ק ברעזאן שליט"א, זון פון הגה"צ אבד"ק אולם שליט"א, און איידעם ביי הגה"צ אבד"ק סטריזוב זאליזשא שליט"א.
די ארגינעלע פלאן איז געווען אז די חתונה וועט פארקומען אין די נייע ריזן אודיטוריום אין שטאט אלעד, אבער צוליב פארשידענע סיבות איז עס נישט געווען פולקאם באשטעטיגט, ביז נעכטן אויפדערנאכט ווען די פארוואלטונג פונעם זאל האט אפיציעל אפגעזאגט די פלאן צו פראווענען די חתונה דארט אין אלעד.
שטייענדיג געציילטע טעג בעפאר די חתונה האבן די עסקנים זיך אריינגעלייגט בעובי הקורה צו טרעפן א פאסיג ארט וואו צו פראווענען די חתונה, היינט אינדערפרי האט מען אנגעפרעגט ביי כ"ק אדמו"ר מצאנז שליט"א איבער די מעגליכקייט פון פראווענען די חתונה אין די גרויסע זאל היכל ראזענבערג אין קרית צאנז נתני', און דער רבי האט דאס באשטעטיגט ביד רחבה וברוח נדיבה.
די חתונה וואס האט געזאלט פארקומען יענע נאכט אין היכל ראזענבערג פון צוויי צאנזער חסידים מחותנים, ווערט אריבערגעפירט צו די זאל אין מלון גלי צאנז.
