ווי באריכטעט האט כ"ק אדמו"ר מוויזניץ שליט"א געוויילט אויף דעם שב"ק אין סקווירא שטעטל, בצל הקודש פונעם שוואגער כ"ק אדמו"ר מסקווירא שליט"א, וועלכער איז דער עלטסטער איידעם ביי הרה"ק בעל ישועות משה מוויזניץ זי"ע.
מטעם קהל צמח דוד אין שיכון סקווירא איז ארויסגעשטעלט געווארן א ספעציעלע מודעה צו באגריסן דעם חשובן גאסט, כ"ק אדמו"ר מסקווירא שליט"א האט ארויסגעשיקט א משלחת פון בניו הרבנים און ראשי הקהילה צו מקבל פנים זיין דעם חשובן גאסט אין לופטפעלד, אזוי אויך איז דער סקווירא רבי אנגעקומען אויף א באזוך אין מאנסי אינעם אכסניא פונעם שוואגער דער וויזניצער רבי גלייך ביים אנקומען קיין ניו יארק.
אין ביהמ"ד הגדול אין סקווירא האט מען צוגעשטעלט א ספעציעלע שטענדער פארן וויזניצער רבי'ן אויפן פלאץ פון דער בעל תפילה, אויך איז צוגעגרייט געווארן ספעציעל דעזיגנירטע ערטער צום דאווענען פאר די וויזניצע חסידים. פרייטאג צונאכטס נאכן דאווענען איז דער גאנצער ציבור אריבער וואונטשן גוט שבת פארן סקווירא רבי'ן, און שלום עליכם און גוט שבת פארן וויזניצער רבי'ן.
די סעודה פרייטאג צונאכטס האט דער וויזניצער רבי געפירט בבית האכסניא ביי הרה"צ ר' אהרן מענדיל טווערסקי שליט"א, ביים טיש איז דער וויזניצער רבי מכובד געווארן מיט הגבהת הכוס צו קידוש, פארזינגען קה רבון חזן וקהל אויפן וויזניצער נוסח, בענטשן ביים טיש, און צו זאגן תורה ביים סוף טיש.
שבת אינדערפרי איז דער וויזניצער רבי מכובד געווארן צו דאווענען שחרית פארן עמוד, מיטן עלי' פון שלישי און מיט הגבה סיי ביי שחרית און סיי ביי מנחה, שבת נאכמיטאג איז פארגעקומען א קידוש בביתו נאוה קודש פון כ"ק אדמו"ר מסקווירא שליט"א, ווי מען האט פארברענגט א לענגערע צייט בדברי תורה וחסידות, דערנאך האט דער וויזניצער רבי געפירט די סעודה דארט אינאיינעם מיט די קינדער פונעם סקווירא רבי'ן.
שבת נאכמיטאג האט הגה"צ ר' חיים מאיר האגער שליט"א בנו יחידו פונעם וויזניצער רבי'ן פארגעלערנט א שיעור פרקי אבות, און שפעטער ביי שלש סעודות איז דער וויזניצער רבי מכובד געווארן צו זינגען א ניגון, און ער האט פארגעזינגען ועל כן נקוה לך חזן וקהל.
מוצאי שבת נאך הבדלה איז דער וויזניצער רבי אריין אויף א לענגערע באזוך ביים סקווירא רבי'ן, ונפרדו לשלום.
