מיט בלויז געציילטע טעג פארבליבן ווערן שוין געמאכט די לעצטע צוגרייטונגען צו די געהויבענע באזוך וואס כ"ק אדמו"ר מוויזניץ שליט"א איז ערווארטעט צו אפרעכטן אינעם עיר התורה והחסידות לעיקוואד, מחזק צו זיין קהל עדת צאן מרעיתו און אויפטרייבן סכומים הגונים פאר די נייע בנין האדיר מרכז העולמי ישועות משה דחסידי וויזניץ אין בני ברק.
די צענטראלע מעמד קבלת פנים וועט פארקומען בקול צהלה ורנה והמון חוגג דעם קומענדיגן דינסטאג פרשת ויצא ב' כסלו, אינעם זעלבן טאג וואס דער רבי וועט לאנדן אין אמעריקע און מופיע זיין בשערי העיר, די גרויסע מעמד וועט פארקומען אין ביהמ"ד הגדול תולדות יעקב יוסף דחסידי סקווירא אויף וועסט קאונטי לעין, וואו עס איז ערווארטעט א ריזן ציבור חסידים און שטאטישע איינוואוינער, אין שפיץ פון אדמורי"ם וראשי הישיבות מנהיגי העיר.
ביים מעמד קבלת פנים וועט דער רבי אויפטרעטן מיט דברות קודש, און דערנאך וועלן אלע אריבערגיין שלום נעמען ביים גרויסן גאסט. שבת קודש וועט געפראוועט ווערן אויף א גרויסע פארנעם אין שטאט לעיקוואד מיט די באטייליגונג פון א ריזן ציבור פון נאנט און ווייט.
