חסידי ביאלא גרייטן זיך מיטצולעבן די געהויבענע שמחת החתונה במעון הקודש פון כ"ק אדמו"ר מביאלא שליט"א, ווען דער רבי מאכט חתונה צום ערשטן מאל נאכן איבערנעמען די כתר האדמורו"ת מיט א האלבע יאר צוריק. די כלה איז א טאכטער ביים רבי'ן, וועלכער איז אן איידעם ביי כ"ק אדמו"ר מקאפיטשניץ שליט"א. די חתן איז א זון פון הרה"ג ר' חיים מאיר ארנסטר שליט"א, זון פון הגה"צ ר' וועלוול ארנסטר שליט"א אבד"ק מאור חיים ירושלים, און איידעם ביי הגה"צ ר' יהושע ליבערמאן שליט"א ראש ישיבת שומרי החומות.
די גרויסע שמחת החתונה וועט געפראוועט ווערן בקול צהלה ורנה קומענדיגע וואך דינסטאג וישלח, אין די גרויסע היכל פון ביהמ"ד מאחנובקא בעלזא אין בני ברק, וואס איז גענוג גרויס צו קענען אקאמאדירן די הונדערטער חסידים וואס קומען זיך מיטפרייען ביים רבינ'ס שמחה. די שמחת החתונה פאר די פרויען וועט זיין אין זאל פון כתר הרימון אין בני ברק.
ווי איינגעפירט בחצר הקודש ביאלא וועט פארקומען א ספעציעלע מעמד ברכת מזל טוב תיכף נאכן חופה, וואו אלע חסידים וועלן האבן די געלעגנהייט אריבערצוגיין וואונטשן מזל טוב פארן רבי'ן דער בעל שמחה כשהמלך במסיבו. בשעת די מעמד החופה וועט פארקומען א ספעציעלע מעמד תפילה דורך די הונדערטער בחורי החסידות, וואס וועלן אויפן רבינ'ס בקשה מתפלל זיין לישועת הכלל והפרט אין ביהמ"ד הגדול מאחנובקא בעלזא, אזוי ווי די בחורים נעמען נישט אנטייל ביי די מעמד החופה.
די שמחה וועט ווערן נאכגעפאלגט מיט די פרייליכע שבת של שמחה שבת שבע ברכות, וואס וועט פארקומען בחצר הקודש ביאלא אין גרויסן בית המדרש אויף רחוב יעקובזון אין ירושלים. הונדערטער חסידים זענען ערווארטעט צו קומען פון אלע שטעט מיטצוהאלטן די פרייליכע שמחה, און א מאסיווע הכנסת אורחים אפאראט איז אקטיוו צוצושטעלן אש"ל מלא פאר אלע געסט.
די סעודות שבת וועט פארקומען אין ביהמ"ד הגדול סלאנים אויף רחוב דורש טוב, און די בניני המוסדות נעבן ביהמ"ד ווערט איינגערישט אלס אכסניא צו שלאפן פאר די הונדערטער געסט. די תפילות און טישן וועט פארקומען אין ביהמ"ד הגדול ביאלא וואס ווערט אויסגעשטעלט מיט די מאקסימום פלאץ צו קענען אקאמאדירן יעדן איינעם.
