אנדערש ווי די ארגינעלע פלענער אינערהאלב די לענגערע באזוך פון כ"ק אדמו"ר מוויזניץ שליט"א אין לאנדאן בקרב חסידיו, וועט זיך דער רבי שליט"א ארויסלאזן היינט דאנערשטאג אויפן וועג צוריק קיין ארץ ישראל, און וועט צופארן צום שטאט ערד וואו דער רבי וועט וויילן אויף אפרוה די קומענדיגע וואכן.
דער רבי איז אנגעקומען קיין לאנדאן מיט צוויי וואכן צוריק, און האט געזאלט פארבלייבן פאר גאנצע דריי וואכן, איינגעטיילט איין וואך אין די סטעמפארד הילל געגנט, און די אנדערע צוויי וואכן אין א אנדערע געגנט אויסער די שטאט. צוליב פארשידענע טוישונגען איז דער רבי פארבליבן אין די סטעמפארד הילל געגנט, און דארט אויפגענומען די חסידים מיט קוויטלעך.
נעכטן מיטוואך אויפדערנאכט איז פארגעקומען א מעמד צאתכם לשלום דורך די חסידים תושבי לאנדאן, אינאיינעם מיט א סעודת ראש חודש, און היינט דאנערשטאג פארלאזט דער רבי ענגלאנד אויפן וועג צוריק קיין ארץ ישראל.
