צום ערשטן מאל נאכן איבערנעמען די כתר האדמורו"ת מיט איבער אכט יאר צוריק, וועט כ"ק אדמו"ר מוויזניץ שליט"א פון מאנסי מופיע זיין בשערי עיר התורה והחסידות לעיקוואד אויף א לענגערע באזוך, און פראווענען דארט א גרויסן שבת אינאיינעם מיט פילע חסידים ומעריצים פון נאנט און ווייט.
דער רבי שליט"א וועט פארן קיין לעיקוואד אויפצוטרייבן גרויסע געלטער ביי די ארטיגע נדיבי לב, לטובת מוסדותיו הקדושים המתנוססים לתפארה אין שיכון וויזניץ מאנסי, און גלייכצייטיג משפיע זיין אויף די תושבי העיר בכלל, און חסידי ומעריצי בית וויזניץ בפרט, וואו בשנים קדמוניות פלעגט אביו הגדול הרה"ק בעל תורת מרדכי מוויזניץ זצ"ל פראווענען שבתים דארט אין שטאט בקרב חסידיו ומעריציו.
דער רבי שליט"א וועט אנקומען צוגאסט אין שטאט קומענדיגן דאנערשטאג פרשת בהעלותך הבעל"ט, און האבן די אכסניא בבית הנגיד החסיד ר' יוסף אטלס הי"ו, לאנגיעריגער בעל אכסניא פון אדמור"י בית וויזניץ אין שטאט. די גאנצע שבת וועט געפראוועט ווערן אין די גרויסע זאל פון בית פייגא אין צענטער פון שטאט, וואו עס איז ערווארטעט א שטראם פון משתתפים ביי די געהויבענע תפילות און טישן דורכאויס שבת.
נאך שבת וועט דער רבי פארבלייבן אין שטאט פאר עטליכע טעג, ארויפגיין לבתי נגידים ושועים און באשיינען א רייע מסיבות לטובת די וויזניצע מוסדות אין מאנסי.
