בחצר הקודש וויזניץ אין וויליאמסבורג איז אין די יעצטיגע טעג באשטעטיגט געווארן די דעטאלן פון א געהויבענע מסע הקודש וואס דער רבי שליט"א וועט אונטערנעמען קיין ארץ ישראל דעם חודש כסלו הבעל"ט, צו באשיינען די שמחת החתונה פון א אייניקל וואס וועט בעז"ה פארקומען בצל הקודש פונעם גרויסן עלטער זיידן כ"ק אדמו"ר מוויזניץ שליט"א לרפואה שלימה.
די כלה איז א טאכטער פונעם רבינ'ס בן יחיד הגה"צ ר' חיים מאיר האגער שליט"א אב"ד תורת מרדכי דחסידי וויזניץ וומס"ב אין מאנסי, איידעם ביי זיין פעטער כ"ק אדמו"ר מוויזניץ שליט"א פון בית שמש, איידעם ביי כ"ק אדמו"ר מוויזניץ שליט"א לרפו"ש. די חתן איז א זון פון הגה"צ ר' ברוך שמעון ארנסטר שליט"א, זון פון הגה"צ ר' מנחם ארנסטר שליט"א ראש ישיבת וויזניץ ב"ב, און איידעם ביי הגה"צ ר' שמואל לוריא שליט"א דומ"ץ וויזניץ אנטווערפן.
די שמחת החתונה וועט בעז"ה פארקומען קומענדיגן מיטוואך פרשת וישלח ט"ו כסלו, אין ביהמ"ד הגדול אין קרית וויזניץ בני ברק, בצל הקודש פונעם גרויסן עלטער זיידן דער וויזניצער רבי שליט"א לרפו"ש, וועלכער איז ליידער נישט בכח ארויסצופארן קיין אמעריקע באשיינען די שמחה, ובמקום מגורי החתן וואס איז אויך א פלומעניק פונעם וויזניצער רבי'ן לרפו"ש.
מאנטאג פרשת וישלח וועט כ"ק אדמו"ר מוויזניץ שליט"א פון וויליאמסבורג זיך ארויסלאזן על אם הדרך אין באגלייטונג פון הונדערטער חסידים, דינסטאג נאכט פרשת וישלח וועט פארקומען די שמחת החתן מאהל אין בני ברק, און צומארגנס מיטוואך די גרויסע חתונה אין ביהמ"ד הגדול אין קרית וויזניץ, במקהלות אלפי חסידים ואנשי מעשה.
אין לויף פון די ימי הביקור וועט דער רבי שליט"א זיך אויפהאלטן אינעם עיר התורה והחסידות בני ברק, און דאווענען די תפילות אין ביהמ"ד וויזניץ אויף רחוב מלצר. מיטוואך ביום החופה וועט דער רבי שליט"א פוקד זיין דעם ציון הק' פון די גרויסע זיידעס צדיקי בית וויזניץ זי"ע, אויפן וויזניצע בית החיים אין בני ברק.
שבת קודש פרשת וישלח וועט דער רבי שליט"א זיין צוגאסט אין עיר התורה והחסידות בית שמש, וואו עס וועט געפראוועט ווערן די שמחת השבת שבע ברכות בצל הקודש פון די זיידעס פון כלה האחים האדמורי"ם מוויזניץ שליט"א פון וויליאמסבורג און בית שמש, אין ביהמ"ד הגדול דחסידי וויזניץ אויף רחוב רבי יהושע אין בית שמש.
דאנערשטאג פרשת וישלח וועט דער רבי שליט"א ארויספארן קיין אתרא קדישא מירון אינאיינעם מיט הונדערטער חסידים, וואו עס וועט פארקומען א מעמד תפילה בהתעוררות רב. מוצאי שבת קודש פרשת וישלח וועט דער רבי שליט"א אפרעכטן א גרויסע שבע ברכות אינאיינעם מיט די פילע חסידים וואס גרייטן זיך מיטצוהאלטן די מסע הקודש. שפעטער אין וואך פרשת וישב נאך די שבעת ימי המשתה, וועט זיך דער רבי שליט"א אומקערן אהיים למעון קדשו אין וויליאמסבורג.
