א היסטארישע חתונה קומט פאר יעצט ביינאכט אין קרית ויזניץ בני ברק, די חתונה פון א אייניקל ביי כ"ק אדמו"ר מויזניץ שליט"א וואס קומט פאר אין ביהמ"ד הגדול בית ויזניץ, מיט די באטייליגונג פון טויזענטער אידן חסידים ואנשי מעשה, און ווערט געפירט דורך הגה"צ המשפיע ר' אלימלך בידערמאן שליט"א.
דער וויזניצער רבי שליט"א וועלכער זיצט שבעה די טעג בעמק הבכא, צו די פטירה פונעם שוועסטער הרבנית הצדיקת מסקווירא ע"ה, האט ערהאלטן די הוראת הקודש פון די דייני הקהילה, אז נאר ביים חופה קען ער זיך משתתף זיין, און די שמחת החתונה די סעודה און די ריקודין דארף פארקומען אין אפוועזנהייט פונעם רבי'ן.
נעכטן מאנטאג די ערשטע טאג פון די שבעה, האט מנחם אבל געווען ביים רבי'ן הגה"צ המשפיע ר' אלימלך בידערמאן שליט"א, דער וויזניצער רבי האט דערמאנט פארן משפיע ר' אלימלך, אז ביי די פארגאנגענע חתונה אין וויזניצע הויף פארלאפענעם זוממער, ווען הרה"צ ר' אלימלך איז געווען א מחותן, האט ער זייער שיין געפירט די חתונה און געהויבן דעם ציבור פאר לאנגע שעות, דעריבער וויל ער בעטן אצינד, אז היות ער קען נישט קומען צו די חתונה צוליב די אבילות, זאל דער משפיע קומען צום חתונה און הייבן דעם ציבור כדרכו בקודש, נאכדערצו אז די כלה איז א יתומה, און עס איז פיל וויכטיגער צו משמח זיין א כלה א יתומה ביום שמחתה.
הרה"צ ר' אלימלך האט אנגענומען די בקשה, און יעצט ביינאכט ביי די חתונה איז ער מפאר בראש השמחה, שוין עטליכע שעה נאכאנאנד וואס דער משפיע שטייט אויפן פלאטפארמע און הייבט דעם ציבור, טויזענטער אידן געפונען זיך דארט און פרייען זיך מיט בשמחת בית צדיקים, ווען דער משפיע ווארעמט אן דעם גאנצן עולם מיט זיינע רייכע דיבורים און בליציגע רעיונות, און באגלייט די שמחה מיט גרויס שמחה וחדוה.
