פילע נגידים ותומכים חסידי וויזניץ און זייערע ידידים פון איבער גרעיטער ניו יארק און ניו דזשערזי, גרייטן זיך מיטצולעבן א זעלטן געהויבענע שבת "מתנה טובה", אין שפיץ פונעם חשובן גאסט כ"ק אדמו"ר מוויזניץ שליט"א, וועלכער איז ערווארטעט אנצוקומען אויף א ספעציעלע באזוך אין אמעריקע צו באשיינען דעם גייסטרייכן שבת.
די שבת וועט זיין געווידמעט פאר די נגידים ותומכים וואס שליסן זיך אן מיט באדייטענדע סכומים ארויסצוהעלפן דעם רבי'ן מיטן שווערן עול, אויסצוצאלן די פאנדן וואס האט געקאסט אויפצובויען דעם גיגאנטישן בנין "בית וויזניץ" אין קרית וויזניץ בני ברק, און געבן דעם לעצטן שטופ אויפן וואגן צו אויסצאלן אלע חובות וואס ליגט נאך אויפן רבי'ן צוליב דעם מאסיוון פראיעקט.
קומענדיגן דאנערשטאג פרשת בחוקותי וועט דער רבי שליט"א ארויספארן ממעון קדשו אין ארץ ישראל אויפן וועג קיין ניו יארק, דער רבי וועט לאנדן שפעט נאכמיטאג, און צופארן צו די פראכטפולע "מלון רעזארט" אין פלארהעם פארק אין ניו דזשערזי, וואו עס וועט פארקומען די גייסטרייכע שבת אויף א רייכע און עלעגאנטע פארנעם.
די פארשטייער פון עסקני קרן הבנין און איגוד מוסדות וויזניץ, וועלן מקבל פנים זיין די חשובע געסט, און זיי אנטפאנגען בכבוד הראוי, דורכאויס שבת וועט זיין צוגעשטעלט א גאר רייכע פראגראם, און צום הויכפונקט וועלן די נגידים זוכה זיין צו מיסב זיין על שולחן מלכים ביי די געהויבענע תפילות און טישן בצל הקודש.
זונטאג פרשת במדבר וועט דער רבי באשיינען די מעמד החומש סעודה פון א אייניקל, שפעטער ביינאכט וועט דער רבי אפרעכטן אין בארא פארק די יארצייט טיש לרגל די הילולא קדישא פון זקינו הרה"ק בעל תורת חיים מקאסוב זי"ע, און דינסטאג פרשת במדבר וועט דער רבי זיך ארויסלאזן אויפן וועג צוריק קיין ארץ ישראל, לקראת אנהייב חודש סיון, יומא דהילולא קדישא פון הרה"ק בעל אהבת ישראל מוויזניץ זי"ע, און חג השבועות הבא עלינו לטובה.
אין די זעלבע צייט גרייט מען זיך שוין צו נאך א נסיעה פונעם רבי'ן קיין ניו יארק קומענדיגע חודש סיון הבעל"ט, צו באשיינען די שמחת החתונה פון א אור אייניקל וואס קומט פאר אין שיכון סקווירא.
