דעם קומענדיגן זונטאג איז כ"ק אדמו"ר מוויזניץ שליט"א ערווארטעט ארויסצופארן אויף נאך א נסיעה קיין ניו יארק, צום פערטן מאל היי יאר תשפ"ד, לרגל די שמחת החתונה פון א אור אייניקל, עלטסטע אייניקל ביי זיין איידעם הגה"צ ר' יצחק טווערסקי שליט"א בן גיסו כ"ק אדמו"ר מסקווירא שליט"א.
די גרויסע חתונה קומט פאר קומענדיגן דינסטאג פרשת שלח אין די גרויסע שאטער אין סקווירא שטעטל, דער וויזניצער רבי וועט וויילן דורכאויס די וואך אין סקווירא, בבית האכסניא ביי הנגיד החסיד ר' אביגדור אסטרייכער הי"ו מראשי הקהילה והמוסדות, און באשיינען די שמחת החתן מאהל מאנטאג נאכט, די שמחת החתונה דינסטאג, און די שבת שבע ברכות בחצר הקודש סקווירא, אינאיינעם מיט הונדערטער חסידי וויזניץ וואס וועלן זיך קומען מיטפרייען ביים רבינ'ס שמחה.
דעם מוצאי שבת קודש איידער דער רבי פארט ארויס אויף די נסיעה, וועט געפראוועט ווערן די געהויבענע שמחת הפארשפיל אין ביהמ"ד הגדול אין קרית וויזניץ בני ברק, בהמשך צו שלש סעודות ברוב עם הדרת מלך. זונטאג אויפדערנאכט וועט דער רבי ארויספארן אויפן וועג, און לאנדן מאנטאג צופרי אין ניו יארק אין א מזל'דיגע שעה.
זונטאג פרשת קרח וועט דער רבי אנקומען קיין מאנסי צו באשיינען א גרויסע מעמד אינערהאלב בית מדרשו קהל צמח צדיק וויזניץ, מעמד הכנסת ספר תורה וואס ווערט אריינגעגעבן דורך הנגיד החסיד ר' יהודה יעקב הכהן כהנא הי"ו, מעמד חנוכת הבית צום פארענדיגן די פראכטפולע געבוי פונעם בנין ביהמ"ד, און די צענטראלע שמחת השבע ברכות פונעם רבינ'ס אור אייניקל, געאייגענט פאר כלל חסידי וויזניץ בארצות הברית.
מאנטאג פארמיטאג נאך שחרית וועט דער רבי ארויספארן צום לופטפעלד אויפן וועג צוריק אהיים, און דינסטאג צופרי איז דער רבי ערווארטעט צו לאנדן בשערי ארץ הקודש.
