נאכפאלגענדיג די הוראת הקודש פון צענדליגע אדמורי"ם רבנים וראשי ישיבות בארץ הקודש, אז אין די יעצטיגע שעת הגזירה טאר מען זיך נישט שטעלן אין לשכת הגיוס אפילו צום ערשטן מאל, נאך די פארשטערקערטע גזירת הגיוס ווען די מדינת ישראל באאמטע האבן ארויסגעשיקט בריוו פאר די בחורים און אינגעלייט, האט כ"ק אדמו"ר מוויזניץ שליט"א דעם שבת ביי שלש סעודות געלאזט הערן חוות דעת תורה הברורה אז קיין שום בחור אדער אינגערמאן זאל זיך נישט שטעלן אין מיליטער אפילו ביים ערשטן פארלאנג.
דאס קומט נאכדעם וואס בנו הגדול פון רבי'ן הגה"צ אב"ד קרית וויזניץ שליט"א האט שוין אונטערגעשריבן די קול קורא אינאיינעם מיט פילע אדמורי"ם ורבנים, וואו עס ווערט קלארגעשטעלט די איסור פון זיך שטעלן אין לשכת הגיוס אין די יעצטיגע תקופה. נעכטן ביי שלש סעודות האט דער רבי זיך באצויגן דערצו, זאגענדיג אז ער האט געהייסן זיין זון אונטערשרייבן די קול קורא, און אצינד וויל ער קלארשטעלן זיין הוראה אז מען זאל זיך טאקע נישט שטעלן אין לשכת הגיוס אפילו בלויז אויף צו באקומען א פטור.
דער רבי האט דערמאנט די שווערע מצב מלחמה אין ארץ ישראל אין די לעצטערע חדשים, און בפרט אין די לעצטע צוויי וואכן ווען די אנגעצויגענקייט איז בלויז העכער געווארן. דער רבי האט געזאגט אז די גרעסטע שמירה איז די לימוד התורה פון די תלמידי הישיבות, און עס קומט נישט אין באטראכט אז דאס זאל ווערן אפגעשטעלט. צום שלוס האט דער רבי געזאגט אז אויב וועט זיין א טויש אין די הוראה איבער זיך שטעלן צום ערשטן מאל, וועט ער לאזן וויסן בעפאר עס הייבט זיך אן די קומענדיגע זמן הלימודים בעז"ה.
