מטעם בית כ"ק אדמו"ר מוויזניץ שליט"א איז באשטעטיגט געווארן אז תיכף נאך די ימים טובים הבעל"ט וועט דער רבי שליט"א ארויספארן אויף א געהויבענע מסע הקודש קיין אוקריינע, אין באגלייטונג פון א קבוצה נכבדה חסידים בעלי בתים און אינגעלייט, וואס וועלן זיך אנשליסן מיט גרויסע סכומים לטובת איגוד מוסדות וויזניץ און מפעל להחזיקם ולהחיותם.
די צוויי קאסעס זענען דעם רבינ'ס פערזענליכע קאסעס, איינס צו העלפן די מוסדות הקדושים דחסידי וויזניץ בארה"ק, און די אנדערע ארויסצוהעלפן חסידי וויזניץ מיט אלע זייערע באדערפענישן, וואס שענקט הילף אין יעדע געלעגנהייט בעת שמחה ומשוש און להבדיל בעת צרה.
די מסע הקודש נעמט אריין א גאר היסטארישע ווענדפונקט, ווען צום ערשטן מאל וועט דער רבי שליט"א פראווענען א גרויסע שבת בעיר האבות וויזניץ, אינעם נאסטאלגישן שטאט וואו די הייליגע זיידעס האבן געוואוינט און משפיע געווען פאר אידישע קינדער, טראץ וואס דער רבי האט שוין פוקד געווען דעם ציון הק' אסאך מאל, האט דער רבי דערווייל נאכנישט געוויילט אויף א שבת אין שטאט וויזניץ, שאפנדיג היסטאריע מיטן יעצטיגן נסיעה הרוממה.
דער רבי שליט"א וועט ארויספארן ממעון קדשו אין קרית וויזניץ בני ברק תיכף נאך די ימים טובים הבאים עלינו לטובה, דאנערשטאג פרשת נח כ"ט תשרי וועט דער רבי שליט"א אנקומען צום שטאט וויזניץ אין אוקריינע, בעצם יומא דהילולא קדישא פון זקינו הרה"ק בעל צמח צדיק מוויזניץ זי"ע וואס ליגט באערדיגט דארט אין שטאט. אינאיינעם מיט די חסידים וועט דער רבי פוקד זיין דעם ציון הק' בעצם יומא דהילולא, און דערנאך אפרעכטן די יארצייט טיש דארט אויפן פלאץ.
זונטאג אויפדערנאכט וועט דער רבי אנקומען צום שטאט סאדיגורא אין אוקריינע, און פוקד זיין דעם ציון הק' פון זקינו דער הייליגער רוזינער זי"ע, חותן המלך פון הרה"ק בעל צמח צדיק מוויזניץ זי"ע. בו בלילה ג' חשון געפאלט די יומא דהילולא קדישא פונעם הייליגן רוזינער זי"ע, און דארט ביים ציון וועט מען אויסבעטן אלעס גוטס לישועת הכלל והפרט, איידער מען וועט זיך ארויסלאזן אויפן וועג צוריק קיין ארץ ישראל אנגעפולט מיט השפעות טובות.
צוליב די מצב המלחמה אין אוקריינע, ווערן געמאכט די נויטיגע צוגרייטונגען דורך די עסקני הנסיעה אויסצוארבעטן אלע דעטאלן על צד היותר טוב, סיי די פונקטליכע וועגן וויאזוי אנצוקומען אין לאנד, און סיי צוצושטעלן די מאקסימום זיכערהייט וואס זאל באגלייטן די גאנצע נסיעה.
