דעם קומענדיגן זונטאג פרשת כי תצא, וועט כ"ק אדמו"ר מוויזניץ שליט"א ארויספארן אויף א בליץ נסיעה קיין ניו יארק, צו באשיינען די שמחת החתונה פון א אור אייניקל, אייניקל פון זיין איידעם הגה"צ ר' יצחק טווערסקי שליט"א בן כ"ק אדמו"ר מסקווירא שליט"א, די חתן איז א דאפלטע אור אייניקל פונעם רבינ'ס שוואגער כ"ק אדמו"ר מסקווירא שליט"א.
זייענדיג שוין די פיפטע מאל וואס דער רבי קומט קיין אמעריקע דאס יאר תשפ"ד, איז די דאזיגע נסיעה געווידמעט אויף א גאר קורצע צייט פון בלויז זעקס און דרייסיג שעה, שטייענדיג אויך בימי הרחמים והרצון אין חודש אלול, ווען טויזענטער חסידים ווארטן אריינצוגיין אל הקודש פנימה לקראת די הייליגע טעג ווי איינגעפירט אין די חסידישע וועלט.
דער רבי וועט לאנדן אין ניו יארק זונטאג נאכמיטאג, די אכסניא וועט זיין ווי געווענליך אין שטוב פון הנגיד החסיד ר' אביגדור עסטרייכער הי"ו אין שיכון סקווירא, מאנטאג אויפדערנאכט וועט פארקומען די גרויסע חתונה אינעם גרויסן שאטער אין שיכון סקווירא, און נאכן חופה וועט פארקומען א מסיבת לחיים אין שפיץ פון רבי'ן אין זאל אביר יעקב אין סקווירא שטעטל. דינסטאג מיטאג וועט דער רבי זיך ארויסלאזן אויפן וועג צוריק קיין ארץ הקודש.
