חסידי וויזניץ אין לאנדאן האבן אויפגענומען מיט גרויס פרייד די ווייטערדיגע פארשריט אינערהאלב די הרחבת גבולי הקדושה אין די וויזניצע מוסדות, ווען מיט גרויס סייעתא דשמיא האט מען ערהאלטן די פערמיטן אויפצובויען א שיינע הערליכע געביידע פאר די מיידל שולע.
בברכת הקודש פון כ"ק אדמו"ר מוויזניץ שליט"א איז די הנהלת המוסדות אריינגעשפרינגען אין דעם פראיעקט מיט עטליכע יאר צוריק, און אפגעקויפט א שטח רחבת ידים אויף לאורדשיפ ראוד, מיטן ציהל אויפצובויען דארט א גרויסע בנין פאר די מיידל שולע. נאך וואס מען האט אריינגעגעבן די פלענער אין די שטאטישער קאונסיל האט מען זיך אנגעשטויסן מיט פילע ביוקראטישע פראבלעמען וואס האט זיך געשלעפט א יאר נאך א יאר.
אין די יעצטיגע טעג איז פארגעקומען א פאבליק הירינג אין אנוועזנהייט פון אלע שכנים, און אסאך נישט אידישע איינוואוינער האבן זיך אפגערעדט אויף די פלענער מיטן ציהל נישט צו לאזן בויען דעם בנין, מיטן אויבערשטנס הילף אבער האבן די עסקנים מצליח געווען צו איבערצייגן די שטאטישע באאמטע, אין באגלייטונג פון צענדליגע וויזניצע חסידים וואס זענען ארויסגעקומען פאראויסצושטופן דעם פלאן.
אויף א וואונדערליכע פארנעם זענען די פלענער אפראווד געווארן, און די הנהלת המוסדות האט ערהאלטן די נויטיגע פערמיטן צו אויפבויען די נייע גרויסע בנין מרחיב צו זיין די גבולי הקדושה. לכבוד די גרויסע דערגרייכונג איז פארגעקומען א מסיבת לחיים אין וויזניצע בית המדרש צו דאנקן און לויבן דעם אויבערשטן אויף די גרויסע חסדים.
לויט די פלענער וועט די נייע קאמפלעקס באשטיין פון עטליכע בנינים, סיי פאר די געברויך פון די חשובע תלמידות, און צו דעם נאך עטליכע בנינים מיט דירות ארויסצודינגען, און דערמיט אריינברענגען א פארדינסט פאר די מוסדות קאסע.
