דעם פרייטאג צונאכטס ביים טיש אין ביהמ"ד הגדול אין קרית וויזניץ בני ברק, האט דער וויזניצער רבי שליט"א דערציילט פאר די חסידים איבער א חלום וואס ער האט געהאט, ווען א נשמה איז געקומען פון אויבן בעטן א תיקון, נאך וואס ער האט עוסק געווען במחלוקת דורכאויס זיין לעבן, און ער האט נישט קיין מנוחה אויבן אין הימל.
דער רבי האט דערציילט אז א באקאנטער איד וואס איז נפטר געווארן עטליכע יאר צוריק, איז געקומען צו אים אין חלום זייענדיג אויף אפרוה אין נתניה. און ווען ער האט געפרעגט פארוואס ער קומט ספעציעל צו אים, האט דער איד געענטפערט אז אין הימל האט מען געזאגט אז דער רבי איז אן איש השלום, דעריבער דארף מען אהערקומען בעטן א תיקון.
דער רבי האט ערווענט אז ער זעט נישט וואס ער זעלבסט קען צוהעלפן דערצו, אז די נשמה זאל צוקומען צו א מנוחה נכונה, די איינציגסטע זאך וואס ער קען טון איז עס צו מפרסם זיין ברבים, און די זכות פון די התעוררות וואס אנדערע אידן וועלן האבן דערפון, צו שטיין ווייט פון מחלוקת, וועט זיכער צוברענגען א תיקון פאר די נשמה.
דאן האט דער רבי מאריך געווען א שמועס איבער די שרעקליכע נסיון פון מחלוקת, און ווי שטארק מען דארף נזהר זיין צו לעבן באהבה ואחוה שלום ורעות.
