א מודעה איז ארויסגעשטעלט געווארן מטעם בית כ"ק אדמו"ר מוויזניץ שליט"א, איבער די בעפארשטייענדע באהאנדלונגען וואס דער רבי שליט"א איז ערווארטעט אדורכצוגיין, מיטן האפענונג צו גענצליך קענען איבערקומען די שווערע מחלה ה"י וואס פלאגט דעם רבי'ן די לעצטע פאר חדשים.
דער רבי שליט"א וועלכער ווערט שוין באהאנדלט פאר עטליכע חדשים, און האלט זיך אויף דערווייל אין שטאט נתני' אויף א פארמאכטע פארנעם, וועט דעם קומענדיגן זונטאג פרשת וארא ארויספארן אויף א קורצע באזוך קיין לאס אנדזשעלעס, מיטן ציהל צו אדורכפירן א סעריע אונטערזוכונגען, אין בעפארברייטונג צו א גרעסערע פראצעדור וואס דער רבי וועט דארפן אדורכגיין אין צוויי חדשים ארום.
ווי עס הייסט יעצט וועט דער רבי וויילן אין לאס אנדזשעלעס ארום א וואך צייט, און דערנאך זיך אומקערן אהיים קיין ארץ ישראל, שפעטער אין חודש אדר וועט דער רבי צוריקפארן קיין לאס אנדזשעלעס פאר א לענגערע תקופה, און מיטן אויבערשטנס הילף וועט די פעולות רפואה ברענגען די גענצליכע ערהוילונג ווי אמשנעלסטן.
