היינט מאנטאג איז ענדגילטיג באשטעטיגט געווארן אז כ"ק אדמו"ר מוויזניץ שליט"א וועט אנקומען אויף א געהויבענע באזוך אין ניו יארק, טראץ חולשת גופו שטייענדיג אינמיטן דורכגיין א סעריע מעדיצינישע באהאנדלונגען, דער רבי וועט בעז"ה באשיינען בראש השמחה ביי די שמחת החתונה פון א אור אייניקל וואס קומט פאר דעם קומענדיגן מיטוואך פרשת משפטים, די כלה א אייניקל ביי כ"ק האדמורי"ם מוויזניץ שליט"א פון וויליאמסבורג און בית שמש.
טראץ וואס צוליב דעם רבינ'ס שוואכע געזונט צושטאנד איז נישט געווען גערעכנט די לעצטע פאר חדשים אז דער רבי וועט באשיינען די חתונה, האבן זיך די פלענער געטוישט אצינד נאך וואס דער רבי דארף במילא ארויספארן קיין לאס אנדזשעלעס, אויף א לענגערע פראצעדור און א קאמפליצירטע אפעראציע וואס דער רבי איז ערווארטעט צו דורכגיין סוף חודש שבט, אין די וואך פון פרשת תרומה, וואס קומט אויס גענוי א וואך נאך די חתונה פונעם רבינ'ס אור אייניקל אין וויליאמסבורג.
דער וויזניצער רבי שליט"א האט אויסגעדרוקט רצון קדשו צו מיטהאלטן די שבת של שמחה, די שבת שבע ברכות וואס קומט פאר אין ביהמ"ד הגדול וויזניץ אין וויליאמסבורג, און היינט איז טאקע באשטעטיגט געווארן די פלענער אז דער רבי וועט פראווענען א גרויסע שבת אין וויליאמסבורג, בהיכל ביהמ"ד הגדול דקהל אהבת ישראל וויזניץ אויף ליע עוועניו, וואס וועט ווערן אויסגעשטעלט מיט די מאקסימום פלעצער צו קענען אקאמאדירן די טויזענטער וויזניצע חסידים פון נאנט און ווייט, וועלכע וועלן מיטהאלטן די ברידערליכע שבת אין שפיץ פון דריי וויזניצע רבי'ס זיידעס פון די כלה, דער חשובער גאסט כ"ק אדמו"ר מוויזניץ שליט"א פון ארץ ישראל, דער מרא דאתרא כ"ק אדמו"ר מוויזניץ שליט"א פון וויליאמסבורג, און דער חשובער גאסט כ"ק אדמו"ר מוויזניץ שליט"א פון בית שמש.
די שמחת החתונה וועלכער האט געזאלט פארקומען בהיכל ביהמ"ד הגדול וויזניץ אין וויליאמסבורג, וועט אצינד ווערן אריבערגערוקט צו א גרעסערע אכסניא, צו קענען אריינעמען פיל מער חסידים ווי געפלאנט, נאך וואס דער געהויבענער זיידע דער וויזניצער רבי וועט מפאר זיין בראש השמחה, צווישן די אפציעס איז די געוועזענע עטרת אברהם זאל בבנין תלמוד תורה סאטמאר, אדער פארשידענע אנדערע אפציעס אין אדער ארום דעם היימישן געגנט אין וויליאמסבורג.
