היינט נאכמיטאג איז כ"ק אדמו"ר מוויזניץ שליט"א אהיימגעקומען לביתו נאוה קודש אין קרית וויזניץ בני ברק, און באשיינט בראש השמחה ביי די שמחת החתונה פון א אייניקל, נאכן זיין שפיטאליזירט זינט נעכטן נאכט נאכן שמחת החתן מאהל.
ווי באריכטעט נעכטן נאכמיטאג, איז דער רבי שליט"א אריינגעפירט געווארן צו די מעייני הישועה שפיטאל אין בני ברק, נאך א אויסטערלישע שוואכקייט די לעצטע פאר טעג. דורכאויס די נאכט האט מען דורכגעפירט מערערע אונטערזוכונגען, און ווי די דאקטוירים זאגן איז די מצב סטאביל ב"ה, און מען באהאנדלט דעם רבי'ן מיט געטריישאפט ער זאל צוריקקומען צו די כוחות ווי אמשנעלסטן.
היינט דורכ'ן טאג אין די זמן המסוגל ביום החופה, זענען פארגעקומען מערערע מניני תהלים ביים ציון הק' פון אדמור"י בית וויזניץ אין בני ברק, וואו טויזענטער אידן זענען זיך צוזאמגעקומען איינרייסן ביים בורא כל עולמים דער רבי זאל זיין געזונט און שטארק, און קענען ווייטער פירן די עדה הקדושה בבריות גופא ונהורא מעליא.
ארום פינף אזייגער נאכמיטאג האט זיך דער רבי אומגעקערט אהיים, און נישט לאנג דערויף ערשינען צום שמחת החתונה אין ביהמ"ד הגדול אין קרית וויזניץ בני ברק. יעצט ביים מעמד החופה בעפאר סידור קידושין דורכ'ן רבי'ן שליט"א, האט די גאנצע ציבור געזאגט קאפיטל שיר המעלות ממעמקים פסוק בפסוק, פארגעזאגט דורכן אבי הכלה הגה"צ ר' יעקב מרדכי האגער שליט"א אב"ד וויזניץ אלעד בן זקוניו פונעם רבי'ן. אזוי אויך האט אויפגעטרעטן ביים חופה המשפיע הגה"צ ר' אלימלך בידערמאן שליט"א, זייענדיג מעורר דעם ציבור צו איינרייסן וועלטן פארן רבינ'ס געזונט. לויטן פלאן וועט דער רבי צוריקפארן אין שפיטאל נאכן חתונה פאר ווייטערדיגע באהאנדלונגען.
אידישע קינדער בכל מקומות מושבותיהם זענען ווייטער מתפלל לרפואתו השלימה פונעם רבי'ן, כ"ק מרן ישראל בן לאה אסתר לרפואה שלימה.
