טראץ וואס לויט די ארגינעלע פלענער האט כ"ק אדמו"ר מוויזניץ שליט"א געזאלט אנקומען קומענדיגע וואך אויף א געהויבענע באזוך אין ניו יארק לפאר על ראש שמחתו, ביי די שמחת החתונה פון א אור אייניקל וואס קומט פאר קומענדיגע וואך מיטוואך בחצר הקודש וויזניץ אין וויליאמסבורג, איז היינט געווארן אפגערופן די פלענער נאך וואס דער רבי שליט"א איז נישט אזוי בכח אונטערצונעמען דעם שווערן נסיעה.
מריחוק מקום וועלן זיך אלפי חסידי וויזניץ מיטפרייען ביי די געהויבענע שמחה, ווען דעם מוצאי שבת קודש פרשת יתרו וועט פארקומען א גרויסע שמחת הפארשפיל אין ביהמ"ד הגדול אין קרית וויזניץ בני ברק, צוזאמען מיט א מעמד צאתכם לשלום לכבודו פונעם רבי'ן, וועלכער וועט אין די נאכפאלגענדע טעג ארויספארן אויף א לענגערע נסיעה קיין לאס אנדזשעלעס, און דארט אריבערגיין א לענגערע מעדיצינישע פראצעדור.
אויפן פערזענליכן איינלאדענונג פונעם וויזניצער רבי'ן שליט"א, וועלכער האט אויסגעדרוקט רצון קדשו צו מיטהאלטן פערזענליך כאטש א חלק פון די שמחה, האט דער רבי פארבעטן די בעלי שמחה צו קומען פון ניו יארק קיין לאס אנדזשעלעס אפצורעכטן דארט די לעצטע שבע ברכות מיטן רבינ'ס השתתפות, און לויטן פלאן וועט די לעצטע שבע ברכות טאקע פארקומען במעון הנופש פונעם רבי'ן אין לאס אנדזשעלעס, קומענדיגן דינסטאג פרשת תרומה הבעל"ט.
אין א מערקווירדיגע שריט איז שטארק מעגליך אז ביים לעצטן שבע ברכות וואס וועט ווארשיינליך פארקומען אין לאס אנדזשעלעס, וועלן זיך באטייליגן זעקס וויזניצע רבי'ס. דער עלטער זיידע כ"ק אדמו"ר מוויזניץ שליט"א, די צוויי זיידעס פון כלה כ"ק האדמורי"ם מוויזניץ שליט"א פון וויליאמסבורג און בית שמש, כ"ק אדמו"ר מוויזניץ שליט"א פון מאנסי וועלכער וועט וויילן יענע וואך אין קאליפארניע אויף אפרוה, כ"ק אדמו"ר מוויזניץ שליט"א פון קייאמישע וועלכער וועט וויילן יענע וואך אין לאס אנדזשעלעס לטובת מוסדותיו הקדושים, און כ"ק אדמו"ר מוויזניץ שליט"א פון ירושלים וועלכער האלט זיך אויף די טעג אין קאליפארניע אויף אפרוה.
