די שמחה און התרגשות ביי אלפי חסידי סאטמאר איז געשטיגן גאר הויעך נעכטן מאנטאג אויפדערנאכט, ווען מען האט זוכה געווען מיטצולעבן א זעלטענע שמחה בחצר הקודש, ווען כ"ק אדמו"ר מסאטמאר שליט"א איז ערשינען במלוא הודו והדרו ביים שמחת התנאים פון די ערשטע אור אייניקל, ודור רביעי ישובו הנה, מיטן רבינ'ס צוריקקער פון א לענגערע נסיעה אויף אפרוה.
צוליב א טעכנישע פראבלעם מיט די פליגער, האט זיך דער רבי ארויסגעלאזט אין וועג היבש שפעטער ווי געפלאנט, און מיט נאכאנאנדע השתדלות האט מען זוכה געווען אז דער רבי איז שוין ערשינען צום שמחת התנאים ארום צען דרייסיג אויפדערנאכט. אנהייב די שמחה בעפאר דעם רבינ'ס אריינקומען האט אויפגעטרעטן דער געהויבענער זיידע הגה"צ אבד"ק סאטמאר וומס"ב שליט"א, און דער אבי הכלה הגה"צ ר' יואל גלאנץ שליט"א מו"ץ בק"ק סאטמאר וויליאמסבורג.
לקול תרועת השמחה האט מען מקבל געווען בהדרת כבוד דעם רבי'ן שליט"א, וועלכער האט זיך באלד ארויסגעלאזט אין פייערליכע ריקודין, באגלייט מיט לעבעדיגע ניגונים און פרייליכע טענץ פון די טויזענטער חסידים אויף די הויכשטאקיגע פארענטשעס.
א לענגערע צייט האט מען געזינגען פרייליכע און התרגשות'דיגע ניגונים, ווען דער רבי לאזט א טרער שהחיינו וקימנו והגיענו לזמן הזה, דער רבי האט אויפגעטרעטן מיט גאר רירנדע דברות קודש, געדאנקט און געלויבט דעם אויבערשטן אויף די גרויסע חסדים, און שטארק געוואונטשן אלע חסידים סיי פונדערנאנט און סיי פונדערווייטנס, אלע זאלן זוכה זיין צו מאכן שמחות מיט הרחבת הדעת.
מיט קריאת התנאים האט דער רבי שליט"א מכבד געווען דעם שוואגער הגה"צ גאב"ד סאטמאר ב"פ שליט"א עלטער זיידע פון די כלה, און נאכן קבלת קנין האט דער רבי געוואונטשן לחיים און מזל טוב פאר אלע זיידעס און מחותנים, גיסו הגה"צ גאב"ד סאטמאר ב"פ, בנו הגדול הגה"צ אבד"ק סאטמאר וומס"ב, הגה"צ אב"ד בארדיוב, הגה"צ אדמו"ר מקארלסבורג מאנטריאל, הגה"צ אב"ד יאסלא, הגה"צ אב"ד שערי תפלה קרית יואל אבי החתן, און הגה"צ ר' יואל גלאנץ אבי הכלה, און א פערזענליכע וואונטש דורכן טעלעפאן פארן עלטער זיידע פון חתן הגה"צ ר' מנשה מאיער שליט"א גאב"ד גרינוויל, וועלכער האט זיך נישט געקענט באטייליגן פערזענליך ביים שמחה.
צום שלוס זענען אלע חסידים אריבער ביים רבי'ן וואונטשן לחיים, און שלום נעמען נאך די לענגערע נסיעה אויף אפרוה אין קאליפארניע. היינט פארמיטאג איז דער רבי ערשינען אויף נאך א מסיבת לחיים בהיכל המתיבתא אין קרית יואל אינאיינעם מיט די טויזענטער בחורי הישיבות.
