נעכטן מוצאי שבת ביים גרויסן שמחת הפארשפיל אין ביהמ"ד הגדול אין קרית וויזניץ בני ברק, וואו טויזענטער חסידים זענען זיך געקומען מיטפרייען ביים רבי'ן אין הויף און זיך געזעגענען בעפאר די לענגערע נסיעה קיין אויסלאנד לצרכי רפואה, האט דער רבי שליט"א געלאדנט אלע חסידים צו קומען אנטיילנעמען ביים גרויסן סעודת הודאה, וואס וועט מיטן אויבערשטנס הילף ווערן אפגעראכטן בקרוב הימים.
דער רבי שליט"א וועלכער לאזט זיך ארויס קומענדיגע וואך אויף א לענגערע נסיעה קיין לאס אנדזשעלעס, וואו דער רבי איז ערווארטעט אדורכצוגיין א לענגערע מעדיצינישע פראצעדור מיטן האפענונג זיך צו היילן פון די ביטערע מחלה ה"י, האט במקהלות אלפי חסידים מפאר געווען ביים שמחת הפארשפיל און מעמד צאתכם לשלום, שטייענדיג בעפאר די שמחת החתונה פון א אור אייניקל אין ניו יארק.
נאך וואס לויטן פלאן וועט דער רבי נישט זיין דעם קומענדיגן יו"ט פורים בקרב חסידיו אין ארץ ישראל, האט מען געזינגען פרייליכע ניגוני פורים ביים פארשפיל, און עס איז פארגעשטעלט געווארן ספעציעלע דרשות דורך די פורים רבנים, באגלייט מיט א פורימ'דיגער אטמאספער. דער רבי האט אויפגעטרעטן מיט דברות קודש און שטארק מחזק געווען די חסידים, זיך האלטן שטארק באמונה ובטחון, און גלייבן אז אלעס וועט בעז"ה זיין גוט.
דער רבי האט ערווענט אז מען זאל זיך האלטן צוזאמען, פראווענען דעם יו"ט פורים בשמחה וחדוה, פראווענען די יומא דהילולא קדישא פונעם פאטער דער רבי זצ"ל אזוי ווי אלע יארן, און מיטהאלטן די שיעורי תורה מדי יום ביומו אזוי ווי דער רבי זצ"ל האט איינגעפירט. צום שלוס האט דער רבי געזאגט מיט רירנדע ווערטער אז ער לאדנט שוין יעצט איין יעדן איינעם זיך צו מיטפרייען ביים סעודת הודאה, וואס וועט געפייערט ווערן אין די נאנטע צוקונפט מיטן אויבערשטנס הילף.
