א שוידערליכע טראגעדיע האט פאסירט די נאכט, אויפן וועג אהיים פון די שמחת החתונה בחצרות הקודש וויזניץ וואס איז פארגעקומען אין ביהמ"ד הגדול וויזניץ אין מאנסי, ווען א חשובער מרביץ תורה פון קרית וויזניץ קייאמישע לעיק איז ליידער טראגיש אומגעקומען אין א שרעקליכע עקסידענט רח"ל.
הרב החסיד ר' מרדכי סאפיר ע"ה מחשובי חסידי וויזניץ, און פון די חשובע איינוואוינער אין קרית וויזניץ קייאמישע לעיק, איז געווען פאר איבער צוואנציג יאר א מלמד תשב"ר אין כתה ז' אין שטעטל, און אויפגעשטעלט חשובע תלמידים נאמנים מיט זיין כח ההשפעה, זייענדיג מרבה פעלים לחינוך הבנים אויך אין אנדערע צייטן, ווי א מתמידים אין די אווענט שעה'ן און נאך פארשידענע פראגראמען.
ער איז געווען א זון פון להבחל"ח הרב החסיד ר' שלמה עקיבא סאפיר הי"ו, און א איידעם ביי הרב החסיד ר' אברהם יודא ניימאן הי"ו, ביידע חשובע זקני חסידים אין שיכון וויזניץ מאנסי.
נעכטן אויפדערנאכט איז ער ארויסגעפארן קיין מאנסי מיטהאלטן די שמחת החתונה בחצרות הקודש וויזניץ, ווען די ברידער כ"ק האדמורי"ם מוויזניץ שליט"א פון מאנסי און קייאמישע האבן חתונה געמאכט זייערע אייניקלעך אין א שמחה'דיגע שטימונג.
זייענדיג אויפן אהיים קיין גיבערס נאך די חתונה, איז ער געווען פארמישט אין א שרעקליכע צוזאמשטויס מיט א נישט אידישע קאר, וואס לויט די סטעיט פאליציי באריכטן איז די נישט אידישע קאר געפארן אויף די פארקערטע ריכטונג און פאראורזאכט דעם שרעקליכן עקסידענט. עס האט פאסירט אויף די ניו יארק 17 ביי עקזיט 126 אין טשעסטער.
זייענדיג אין קאר נאר מיט זיין בחור וועלכער איז ליידער אויך קריטיש פארוואונדעט געווארן, איז בלויז די געווענליכע אמבולאנס אנגעקומען און געשאנקען ערשטע הילף, ביז די חברה הצלה פון קרית יואל און מאנסי זענען אנגעקומען אויפן סצענע, ליידער האבן זיי באשטעטיגט אז ר' מרדכי איז טראגיש אומגעקומען רח"ל אין די עקסידענט, און זיין בחור איז געווארן אפגעפירט צו די ארענדזש רידזשענעל שפיטאל וואו מען האט סטאבליזירט זיין מצב, און אים שפעטער אריבערגעפירט צו א אנדערע שפיטאל פאר בעסערע באהאנדלונגען, אידישע קינדער זענען מתפלל לרפואתו, הב' קלמן יהושע בן אסתר מלכה ברכה לרפואה שלימה.
די לוויה וועט פארקומען היינט 11:30 פארמיטאג פארנט פון ביהמ"ד הגדול און תלמוד תורה אין קרית וויזניץ קייאמישע לעיק, דערנאך ארום 2:00 ביי ביהמ"ד הגדול וויזניץ אין מאנסי.
ויהי רצון שלא ישמע עוד שוד ושבר בגבולינו.
