א שיינע מעמד הכנסת ספר תורה איז פארגעקומען אין די גאלדערסגרין געגנט אין לאנדאן, ווען עס איז אריינגעגעבן געווארן א ספר תורה צום בית הכנסת בית ישראל, לזכרו פונעם רב הביהמ"ד און ראש בית דין פון לאנדאן הבירה, הגאון הגדול רבי חנוך עהרנטרוי זצ"ל, וועלכער האט פארשיינט די שטאט מיט זיין גדלות בתורה והוראה.
צום גרויסן מעמד לכבודה של תורה זענען געקומען צו פארן פילע געסט, ידידי ומעריצי הקהילה און די נאנטע בני המשפחה, אין שפיץ פון הגאון ר' אשר עהרנטרוי שליט"א זון פונעם ראב"ד זצ"ל. אויך האט זיך אנגעזעהן דער לעגענדארער שריפטשטעלער און טעטיגער עסקן הרב טובי' פריינד שליט"א וועלכער איז געווען פון די נאנטע מקורבים ביים ראב"ד זצ"ל.
די סיום כתיבת ספר תורה איז פארגעקומען אין שטוב פונעם ראב"ד זצ"ל, און בקול צהלה ורנה איז די ספר תורה געפירט געווארן מיט לעבעדיגע טענץ צום היכל ביהמ"ד בית ישראל, שאפנדיג א וואונדערליכע מחזה לכבודה של תורה אויף די שטאטישע גאסן, ווען פילע אידן טאנצן און פרייען זיך לגומרה של תורה. נאך די ריקודין איז פארגעקומען די סעודת מצוה אין די פראכטפולע קינלוס זאל, וואו עס האט אויפגעטרעטן הגאון ר' דוד דוננער שליט"א רב הקהילה, חתנו וממלא מקומו פונעם ראב"ד זצ"ל.
