דעם שבת וועט כ"ק אדמו"ר מקאסאן שליט"א זיין צוגאסט אין זיין ארגינעלע היימשטאט בארא פארק, לרגל די שמחת השבע ברכות פון א אייניקל, און דערביי וועט געפראוועט ווערן די שבת חנוכת הבית צום איבערבוי פון די בית המדרש אין די לעצטערע חדשים, וואס איז אצינד אין א מזל'דיגע שעה פארענדיגט געווארן לשם ולתפארת.
ווי באקאנט האט דער רבי שליט"א זיך אריבערגעצויגן למקום מושבו אין לינדען ניו דזשערזי מיט עטליכע יאר צוריק, און די בית המדרש אין בארא פארק איז ווייטער פארבליבן אלס א חסידישע צענטער פאר תלמידי וחסידי קאסאן, אין שפיץ פון דעם רבינ'ס קינדער וואס וואוינען אין שטאט, און דער רבי שליט"א זעלבסט וועלכער קומט כסדר אריין קיין בארא פארק אויף ימים טובים און שיינע שבתים.
אין די לעצטערע חדשים איז אונטערגענומען געווארן רענאוואציע ארבעט צו פארגרעסערן און פארשענערן דעם בנין בית המדרש, און אצינד ווען מ'האט זוכה געווען לברך על המוגמר, וועט דעם שבת געפראוועט ווערן די חנוכת הבית, ווען דער רבי שליט"א איז צוגאסט אין בארא פארק לרגל השמחה במעונו, די שבת שבע ברכות בבית בנו הגה"צ ר' משה שמואל ראטטענבערג שליט"א רב הביהמ"ד, איידעם ביי הגה"צ מטאמאשוב שליט"א, מיטן חתן א זון פון הגה"צ אבד"ק שמן למנחה נאדיפאלי שליט"א.
