שטייענדיג עטליכע וואכן נאך וואס די נייע בנין פון ישיבה קטנה אמרי חיים וויזניץ אין בארא פארק, איז באנייעט געווארן אין א מזל'דיגע שעה דורך די תלמידי הישיבה, איז באשטעטיגט געווארן די גענויע דעטאלן פון די גרויסע מעמד חנוכת הבית און הכנסת ספר תורה, בנדבת לבו פון הנגיד החסיד ר' בנציון לעבאוויטש הי"ו מגדולי תומכי המוסדות, בונה ומקים פון די נייע בנין הישיבה, לעילוי נשמת אביו הרב החסיד ר' יחיאל לעבאוויטש ע"ה.
די גרויסע חגיגה וועט פארקומען קומענדיגן ראש חודש ניסן הבעל"ט זונטאג פרשת ויקרא, למחרתו פון די יומא דהילולא קדישא פון כ"ק אדמו"ר הרה"ק בעל תורת מרדכי מוויזניץ זצ"ל. די חגיגה וועט ארייננעמען צוויי גרויסע מעמדים, אנגעהויבן מיט די מעמד הכנסת ספר תורה ברחובה של עיר, די ריקודים אין די נייע היכל הישיבה, און די פראכטפולע סעודת מצוה און מסיבת חנוכת הבית לכל הקהל הקודש.
