יעצט נאכמיטאג קומט אן די ביטערע בשורה איבער די פטירה פון הרבנית הצדיקת מקאסאן לעיקוואד, הרבנית חי' מלכה ראטטענבערג ע"ה, אשת חבר כ"ק אדמו"ר מקאסאן לעיקוואד שליט"א, וועלכער איז נפטר געווארן אין בליענדן עלטער פון אכט און זעכציג יאר.
די רעבעצין ע"ה איז געווען א טאכטער פון כ"ק אדמו"ר הרה"ק רבי צבי מאיר פאנעט זצ"ל מדעעש, בעל אמרי צבי, און איז אויפגעוואקסן אין שטוב פון אירע חשובע עלטערן וואס האבן געוואוינט אין וויליאמסבורג, און שפעטער פאר א תקופה אין שטאט בני ברק. בהגיעה לפירקה האט זי חתונה געהאט מיט להבחל"ח איר חשובער מאן דער רבי שליט"א, א זון פון כ"ק אדמו"ר הרה"ק רבי מנחם ישראל זצ"ל מקאסאן, און אלע יארן געשטאנען לימינו צו העלפן משפיע זיין פאר די עדה חסידים ובכל צעד ושעל.
אין די לעצטע פאר וואכן איז זי געווען זייער נישט געזונט, נאך וואס מען האט אנטדעקט ביי איר די ביטערע מחלה ה"י אויף א גאר שווערע פארנעם, אהיימקומענדיג פון ארץ ישראל פון די חתונה פון א אייניקל, בבית חתנה הגה"צ ר' יעקב מרדכי האגער שליט"א אב"ד וויזניץ אלעד. היינט נאכמיטאג איז די רעבעצין נפטר געווארן לחיי העולם הבא, ווייניגער ווי צוויי יאר זינט די פטירה בשיבה טובה פון איר מאמע הרבנית מדעעש ע"ה, צו וועם זי האט זיך אלע יארן איבערגעגעבן מיט א זעלטענע געטריישאפט און מסירת נפש.
די רעבעצין לאזט איבער א הערליכע דור ישרים יבורך, איר חשובער מאן דער רבי שליט"א, און די זיהן הגה"צ ר' פנחס שלום ראטטענבערג שליט"א איידעם ביי כ"ק אדמו"ר מקאזעווע שליט"א, הגה"צ ר' יהוסף יחזקאל ראטטענבערג שליט"א איידעם ביי כ"ק אדמו"ר מטשערנאביל שליט"א, הגה"צ ר' משה שמואל ראטטענבערג שליט"א איידעם ביי הגה"צ אבד"ק ווייטצען שיקאגא שליט"א, הגה"צ ר' יצחק יחיאל מיכל ראטטענבערג שליט"א איידעם ביי כ"ק אדמו"ר מסאטינוב שליט"א, און הגה"צ ר' ישעי' נפתלי ראטטענבערג שליט"א איידעם ביי כ"ק אדמו"ר מקאסאן לאנדאן שליט"א.
די איידימער זענען הגה"צ ר' יעקב מרדכי האגער שליט"א אב"ד וויזניץ אלעד, יונגסטע זון פון כ"ק אדמו"ר מוויזניץ שליט"א לרפו"ש, הגה"צ ר' בערל שנעעבאלג שליט"א מנהל ישיבה גבוה אמרי חיים וויזניץ אין נייעק, הגה"צ ר' שמואל יהודה סעקולא שליט"א זון פון הגה"צ מסאדאוונא שליט"א, און הגה"צ ר' מרדכי טויב שליט"א זון פון הגה"צ אבד"ק קאלוב וומס"ב שליט"א.
אזוי אויך לאזט די רעבעצין איבער אירע חשובע געשוויסטער, די ברידער כ"ק האדמורי"ם מדעעש שליט"א פון ארץ ישראל, וויליאמסבורג, און קרית יואל, הגה"צ ר' מענדיל פאנעט שליט"א מדעעש ב"פ, הגה"צ ר' יוסף און הגה"צ ר' יעקב אלימלך פאנעט שליט"א מדעעש וומס"ב. די שוועסטערס זענען הרבנית משאץ, אשת הגה"צ ר' משה יוסף מאסקאוויטש שליט"א משאץ ב"פ, און הרבנית משאפראן, אשת הגה"צ ר' דוד משה מייזליש שליט"א משאפראן.
צווישן פילע רבי'ס און רבנים האט זי זיך משדך געווען מיט כ"ק מרנן האדמורי"ם מוויזניץ, טשערנאביל, קאלוב, דעעש, שאץ, ביאלא ב"ב, האחים האדמורי"ם מקאסאן, ביקסאד, נאראל, און אירע שוואגערס האדמורי"ם מקאסאן, קאסאן לאנדאן, פארשעי, און ראזלא.
די לוי' קומט פאר היינט 9:30 ביינאכט ביי איר שטוב אין לעיקוואד.
