א גאר היסטארישע מעמד כבוד התורה איז פארגעקומען אינערהאלב קהילה קדושה גור אין בארא פארק, ווען הונדערטער אינגעלייט האבן זיך ברוב עם געשטעלט צום פארהער אויף טויזענטער בלעטער גמרא אין ראם פון די סדר לימוד "מזומנים". די מעמד איז פארגעקומען אין די נייע שטיבל "ברכת אליהו", וואו עס איז איינקוואטירט די כולל מזומנים, אין שפיץ פון דער אורח הכבוד הגה"צ ר' נחמי' אלתר שליט"א בן כ"ק אדמו"ר מגור שליט"א.
אויפן בימת הכבוד האבן באשיינט הגה"צ ר' נחמי' אלתר שליט"א בן כ"ק אדמו"ר מגור שליט"א, דער מרא דאתרא הגה"צ ר' הערשל ראטטענבערג שליט"א, דער בוחן הגה"צ ר' מאיר צוויבל שליט"א רב ביהמ"ד קדושת יו"ט ד'סאטמאר ומח"ס נר המאיר, הגה"צ ר' ישראל משה אלעווסקי שליט"א ראש ישיבת גור, הגאון ר' דוד קאמפינסקי שליט"א, הגאון ר' אהרן פרענקל שליט"א, הגאון ר' יעקב אבראמאוויטש שליט"א, הגאון ר' מאיר ווידיסלאווסקי שליט"א, הגאון ר' ישראל רובינפעלד שליט"א, הרב מענדל מאשקאוויטש שליט"א, און דער חשובער משפיע הגאון החסיד ר' איטשע מאיר טאומאן שליט"א.
צוערשט האט אויפגעטרעטן דער חשובער גאסט הגה"צ ר' נחמי' שליט"א, און דערנאך האבן די חשובע אינגעלייט געמאכט די סיום מסכתות, אין סדרי מועד און נזיקין, ווען דער מייסד הכולל בשליחות הקודש הנגיד המפואר ר' מאיר פריי הי"ו האט געזאגט קדיש. דערנאך האט מען געטאנצן לעבעדיג לכבוד התורה, און דאן איז פארגעקומען די פארהער ווען די אינגעלייט האבן געצייגט זייערע וואונדערליכע ידיעות בכל חדרי התורה.
דערנאך האט אויפגעטרעטן דער מרא דאתרא הגה"צ ר' הערשל ראטטענבערג שליט"א, און די כבוד התורה איז דערהויבן געווארן צו א העכערע אטמאספער לשם ולתפארת.
