א געמיינזאמע קול קורא ערשיינט אצינד אין ארץ ישראל, אונטערגעשריבן דורך מערערע גדולי הדור מנהיגי העדה, פון די חסידישע קרייזן, די ליטווישע קרייזן, און די ספרדישע קרייזן, וואו זיי רופן דעם ציבור צו שטיין כחומה בצורה קעגן די שרעקליכע חילול שבת וואס גייט אין אין געוויסע געגנטער, ווען גרויסע שאפינג צענטערס זענען אפן בעצם יום השבת קודש.
דאס קומט נאכדעם וואס א נייע ריזיגע שאפינג צענטער נישט ווייט פון בני ברק, האט געמאלדן אז זיי גייען עפענען זייערע געשעפטן ביום השבת ה"י, וואס האט ווי פארשטענדליך געפירט צו א העפטיגע מערכה דורך שלומי אמוני ישראל מוחה צו זיין אויף דעם חילול השבת קודש.
די גדולי הדור אין ארץ ישראל האבן זיך פאראייניגט אויף א היסטארישע קול קורא צו מוחה זיין כדת של תורה, און שטעלן א באפעל צו אידישע קינדער וואס זענען מקפיד אויף שמירת שבת, אז מען זאל בכלל נישט איבערטרעטן די שוועל פון דעם שאפינג צענטער, און אזוי אויך אנדערע געשעפטן וואס טראגן דעם נאמען.
די קול קורא איז אונטערגעשריבן דורך כ"ק מרנן האדמורי"ם מגור, בעלזא, וויזניץ, צאנז, באיאן, טשערנאביל, מאחנובקא בעלזא, מודזיץ, אלכסנדר, ערלוי, סערט וויזניץ, סטריקוב, שבט הלוי, ביאלא, נדבורנא, זוועהיל, ראחמיסטריווקא, סאדיגורא, און לעלוב. מרנן ראשי ישיבת סלאבאדקע, פאנאוויטש, הגאון רבי מאיר צבי בערגמאן, הגאון ר' יצחק זילבערשטיין, און נאך פילע גדולי ישראל.
