אנדערש ווי געפלאנט איז היינט געמאלדן געווארן, אז כ"ק אדמו"ר מוויזניץ שליט"א וועט פארבלייבן אויף יו"ט פסח אין לאס אנדזשעלעס קאליפארניע, וואו דער רבי האלט זיך אויף די לעצטע פאר חדשים מיטן האפענונג זיך צו היילן פון די ביטערע מחלה ה"י, בסייעתא דשמיא און מיטן שטענדיגן הילף פון די ארטיגע פראפעסארן.
דער רבי שליט"א וועלכער האט געוויילט די לעצטע צוויי וואכן בבית האכסניא אין שטוב פון הנגיד החסיד ר' שמואל בנימין איינהארן הי"ו, נאכן זיך ערהוילן פון די שווערע אפעראציע וואס דער רבי איז אריבער מיט עטליכע וואכן צוריק, איז נעכטן צוריק אריינגעפארן אין שפיטאל אויף אונטערזוכונגען, נאך וואס דער רבי איז געווארן אנגעשטעקט מיט א פרישן אינפעקציע און האט אפגעשוואכט דעם רבינ'ס געזונט צושטאנד.
אויפן ראט פון די דאקטוירים איז באשטעטיגט געווארן אז דער רבי וועט פארבלייבן אין לאס אנדזשעלעס פאר יו"ט, נאך וואס די לאנגע נסיעה אהיים קען שלעכט אויסווירקן אויפן רבינ'ס מצב, לויטן פלאן וועט דער רבי פראווענען דעם יו"ט בבית האכסניא אין שטוב פון הנגיד החסיד ר' שמואל בנימין איינהארן הי"ו, און די קינדער פונעם רבי'ן וועלן ארויספארן קיין לאס אנדזשעלעס צו וויילן אויף יו"ט צוזאמען מיטן רבי'ן.
וויבאלד דעם רבינ'ס משפחה וועט אויך וויילן אין חוץ לארץ אויף יו"ט, וועט דער רבי האלטן צוויי טעג יו"ט, ווי עס האט זיך געפירט זקינו הרה"ק בעל אמרי חיים מוויזניץ זי"ע ווען ער איז געווען צוגאסט אויף יו"ט פסח אין ניו יארק בשנת תשי"ד.
אידישע קינדער זענען ווייטער מתפלל לרפואתו השלימה פונעם רבי'ן, כ"ק מרן ישראל בן לאה אסתר לבריות גופא ונהורא מעליא, אין די צייט וואס דעם רבינ'ס שוואגער הגה"צ ר' מנחם ארנסטר שליט"א ראש ישיבת וויזניץ וועט פראווענען דעם יו"ט אין ביהמ"ד הגדול אין קרית וויזניץ בני ברק, אינאיינעם מיט פילע חסידים ותושבי הקריה.
