מטעם בית כ"ק אדמו"ר מוויזניץ שליט"א איז געמאלדן געווארן פאר די טויזענטער חסידים ברחבי תבל, אז אויך דאס יאר לקראת די ימי הרחמים והרצון, וועלן די חסידים האבן די געלעגנהייט אריינצוגיין אל הקודש פנימה זיך וואונטשן צום נייעם יאר, כנהוג בחצרות הצדיקים ווען די חסידים זענען זיך מזכיר ביים רבי'ן בפתקא ופדיון לקראת די הייליגע טעג, אויסצובעטן א שנת גאולה וישועה.
ביי כלל ישראל אין אלע דורות האבן אידן געזוכט צו מקבל זיין א ברכה פון א ערליכע איד בעפאר די הייליגע טעג, און שוין הונדערטער יארן וואס עס גייט אן דער מנהג ביי חסידישע קרייזן אז מען גייט אריין צום רבי'ן מיט א קוויטל להיפקד בדבר ישועה ורחמים, שטייענדיג אין די טעג פון חודש אלול אין די ימי הרחמים והרצון.
יאר יערליך פלעגט כ"ק אדמו"ר מוויזניץ שליט"א ארומפארן איבער די שטעט אין ארץ ישראל צו אויפנעמען די חסידים מיט קוויטלעך, איינגעטיילט לויט די טעג און וואכן בעפאר ראש השנה, כדי נישט צו באמוטשענען די חסידים אריינצוקומען קיין קרית וויזניץ בני ברק אריינצוגיין אל הקודש פנימה.
דאס יאר ווען דער רבי שליט"א וויילט אויף אפרוה אין מושב אורה נעבן ירושלים, נאך א שווערע יאר וואס דער רבי שליט"א איז אריבער אין געזונט, קעמפנדיג קעגן די ביטערע מחלה ה"י מיט פארשידענע פרואוון און מעדיצינישע באהאנדלונגען, איז געמאלדן געווארן מטעם די גבאים און משמשים בקודש, אז טראץ וואס דער רבי איז טאקע נישט בכח ארומצופארן איבער די שטעט צו פראווענען די חסידים, וועט מען אבער יא קענען אריינגיין אל הקודש פנימה, אינעם רבינ'ס אכסניא אין מושב אורה.
זיך גרייטענדיג אויף א מאסן צוזאמפאר פון טויזענטער חסידים וואס וועלן פוקד זיין דעם רבינ'ס שטוב אין די קומענדיגע פאר וואכן ביז ראש השנה, איז געמאלדן געווארן אז עס וועט ווערן איינגעשטעלט א ספעציעלן סדר וואס זאל ערמעגליכן פאר יעדן חסיד אריינצוגיין אל הקודש פנימה, בלויז די עלטערן און נישט די משפחות, איינגעטיילט אין באזונדערע קבוצות מיטן זיך איינשרייבן פון פריער.
צוליב דעם וואס דער רבי וויילט אין א שטילע געגנט, וואס ערלויבט נישט קיין ערנסטע פארקער פון פריוואטע קארס און מאסן מענטשן, וועט מען נישט ערלויבן די חסידים צו קומען מיט פריוואטע קארס, נאר מיט ספעציעלע טראנספארטאציע מיטלען וואס וועט ווערן צוגעשטעלט אויף א מייסטערהאפטיגן סדר, איינגעטיילט לויט די שטעט פון ארץ ישראל.
צו דעם איז פראקלאמירט געווארן די מבצע "פתקא דרחמי" צו געבן די געלעגנהייט פאר יעדן חסיד אריינצוגיין אל הקודש פנימה, אין צוזאמענהאנג מיט די עסקנים וואס נעמען צוזאם די מעמדות געלט פארן רבינ'ס שטוב דורכאויס די גאנצע יאר. אינעם רבינ'ס אכסניא וועט זיין צוגעשטעלט כיבוד פאר די חסידים זיך צו דערכאפן דאס הארץ נאכן קומען צו פארן פון איבער גאנץ ארץ ישראל.
