חסידי וויזניץ אין אמעריקע לעבן מיט געהויבענע טעג, בצל הקודש פון כ"ק אדמו"ר מוויזניץ שליט"א לרפו"ש וועלכער איז אנגעקומען צוגאסט קיין אמעריקע לפאר על ראש שמחותיו, צו באשיינען די צוויי שמחות החתונות במעון קדשו.
דער רבי שליט"א האט געלאנדעט אין ניו יארק פארלאפענעם זונטאג פארטאגס, און האלט זיך אויף בבית האכסניא ביי הנגיד החסיד ר' אביגדור עסטרייכער הי"ו אין שיכון סקווירא, זונטאג נאכט האט דער רבי באשיינט די שמחת החתן מאהל פון נכדתו הכלה אין ביהמ"ד הגדול אין שיכון סקווירא, און דערנאך אריין אויף א באזוך ביים שוואגער כ"ק אדמו"ר מסקווירא שליט"א.
נעכטן מאנטאג האט דער רבי באשיינט בראש המסובים ביי די גרויסע חתונה אין ביהמ"ד הגדול אין שיכון סקווירא, דער רבי איז מכובד געווארן מיט סידור קידושין און האט אונטערגעפירט מצד הכלה, ביים שמחה האבן זיך אנגעזעהן פילע וויזניצע חסידים וואס זענען געקומען זיך מיטפרייען בשמחתו הגדולה פונעם רבי'ן, און נהנה זיין מזיו אורו בזמן שהצדיק בעיר.
היינט דינסטאג וועט דער רבי אנקומען קיין מאנסי לבית מדרשו קהל צמח צדיק וויזניץ, וואו דער רבי וועט אויפנעמען דעם ציבור חסידים מיט קוויטלעך להיפקד בדבר ישועה ורחמים. מארגן מיטוואך וועט געפראוועט ווערן די גרויסע שמחת החתונה במעון הקודש פונעם רבי'ן, די כלה א טאכטער פון זיין איידעם הגה"צ ר' נפתלי צבי טייטלבוים שליט"א.
די מעמד קבלת פנים און חופה וועט פארקומען אין ביהמ"ד הגדול לבוש מרדכי אין שיכון וויזניץ מאנסי, קבלת פנים וועט זיך אנהייבן פיר אזייגער נאכמיטאג, און די מעמד החופה פינף אזייגער. דערנאך וועט פארקומען די סעודת החתונה אין זאל פון אטריום פלאזא, און פאר די חסידים וועט זיין צוגעשטעלט די סעודת החתונה אינעם היכל הטישן בבנין ביהמ"ד הגדול אין שיכון וויזניץ מאנסי.
שפעטער ארום אכט דרייסיג אויפדערנאכט וועט דער רבי שליט"א מופיע זיין צום שמחת החתונה ברוב עם אין ביהמ"ד הגדול וויזניץ, וואו די חסידים וועלן זיך מיטפרייען בריקודין של שמחה, נאכגעפאלגט מיט די געהויבענע מצוה טאנץ ארום צען אזייגער ביינאכט.
אנדערש ווי געפלאנט אז דער רבי וועט גיין דאנערשטאג אין א לאקאלע שפיטאל פאר באהאנדלונגען, און צוריקפארן קיין ארץ ישראל נאך שבת, וועט זיך דער רבי שליט"א ארויסלאזן אויפן וועג אהיים שוין דאנערשטאג פארטאגס ממחרת החתונה, און באלד ביים אנקומען קיין ארץ ישראל וועט דער רבי אריינפארן צו די הדסה שפיטאל אין ירושלים פאר רוטינע באהאנדלונגען פון עטליכע שעה, און וועט בעז"ה שוין זיין אינדערהיים נאך פאר שבת, בבית האכסניא אין מושב אורה נעבן ירושלים.
