היינט אינדערפרי נאך תפילת שחרית אין ביהמ"ד הגדול באבוב אין בארא פארק, איז כ"ק אדמו"ר מבאבוב שליט"א ארויף אויפן ארון הקודש און אויפגעטרעטן מיט הארציגע דברות קודש אין ליכט פון די שווערע מצב המלחמה וואס הערשט אין ארץ ישראל, ווען אחינו בני ישראל דרי ארה"ק געפונען זיך אין פחד און זארג צוליב נאכאנאנדע אטאקעס.
דער רבי שליט"א האט ערווענט אז ער באקומט כסדר טעלעפאן רופן פון אנשי שלומו בארה"ק, און עס איז קלאר אז מען טאר נישט שטיין גלייכגילטיג אין די דאזיגע צייט, ווען אונזערע ברודער אין ארץ ישראל לעבן אין פחד און זארג, מיט נאכאנאנדע מיסיל אטאקעס און פייפערייען וואס שיקט דעם ציבור אין די שעלטערס מיט קליינע קינדער ה"י.
דער רבי האט געזאגט אז מ'זעהט אפענע חסדי ה' ווען גאר אסאך זענען שוין געראטעוועט געווארן פון פליענדע מיסילס, אבער כלל ישראל איז אנגעוואנדן אין א ישועה און מען דארף מעורר זיין רחמים אז די מצב זאל זיך בארואיגן און עס זאל נישט שאטן פאר קיין שום אידיש קינד.
נאך די דברות קודש איז פארגעקומען די שמחת הברית ביי איינער פון די חסידים, וואס דער רך הנולד איז געבוירן געווארן מיט עטליכע וואכן צוריק אין ארץ ישראל. דער רבי האט זיך אויסגעדרוקט אז די דאזיגע שמחה טוט דערמאנען פאר תושבי חוץ לארץ אז מיר זענען נאנטע ברידער מיט די אידן אין ארץ ישראל, און מען דארף זיי אינזין האבן אויף טריט און שריט.
אין די יעצטיגע טעג איז אויך ארויסגעשטעלט געווארן א מודעה מטעם קהל שערי ציון ד'באבוב, אז צוליב די שווערע מצב אין ארץ ישראל ווען די ארטיגע אידן געפונען זיך אין א צרה רח"ל, האט כ"ק אדמו"ר מבאבוב שליט"א געבעטן פונעם ציבור צו זאגן נאכן דאווענען דריי קאפיטלעך תהלים, קאפיטל כ', קכ"א און ק"ל, והן קל כביר לא ימאס תפילת הרבים.
