תלמידי וחסידי וויען גרייטן זיך מיטצוהאלטן א זעלטענע און היסטארישע מעמד "פדיון פטר חמור", וואס וועט פארקומען דעם קומענדיגן זונטאג פרשת עקב הבעל"ט, אינעם גרויסן בית המדרש אין מחנה מתיבתא נחלת יעקב ד'וויען אין לאק שעלדרעיק.
די זעלטענע מציאות פון מקיים זיין די מצוה פון פדיון פטר חמור, איז אצינד פארווירקליכט געווארן ביי איינער פון די וויענער חסידים וועלכער פארמאגט א פארם, און א אייזעלע איז געבוירן געווארן דארט אלס עלטסטע צו זיין מאמע. אנדערש ווי ביי אנדערע מעמדי פדיון פטר חמור וואס קומט פאר אין רעבישע הויפן, וואו דער בעל הבית איז מכבד דער רבי צו מקיים זיין די מצוה, וועט ביי דעם מעמד דער בעל הבית זעלבסט מקיים זיין די מצוה, וויבאלד כ"ק אדמו"ר מוויען שליט"א איז דאך א כהן, און וועט דינען אלס כהן הפודה.
די מעמד וועט פארקומען ברוב עם הדרת מלך אין ביהמ"ד אין מתיבתא קעמפ, וואו כ"ק אדמו"ר מוויען שליט"א האלט זיך אויף אין לויף פון די זוממער וואכן, און וועט ווערן מיטגעהאלטן דורך די תלמידי המוסדות, בחורי הישיבות דחסידי וויען, אברכי הכוללים און בעלי בתים.
