אין די יעצטיגע טעג איז באשטעטיגט געווארן די גענויע דאטום ווען עס וועט פארקומען די פייערליכע חגיגה בחצר הקודש וויען, די לאנגערווארטעטע מעמד הכנסת ספר תורה פאר די ספר תורה וואס איז געשריבן געווארן דורך כלל חסידי וויען, לזכותו ולהשפעתו פונעם מנהיג העדה כ"ק אדמו"ר מוויען שליט"א.
די ספר תורה איז א פראיעקט פון אלע תלמידים וחסידים זקנים עם נערים, אלע האבן גענומען א טייל דערין, יונגעלייט און בעלי בתים, און די בחורי חמד אין א באזונדערע פראגראם, ווען עטליכע מאל איז שוין פארגעקומען מעמדי כתיבת אותיות צו מזכה זיין יעדן איינעם מיט א זכות אינעם ספר תורה.
אצינד ווען מען גרייט זיך צום גרויסארטיגן חגיגה איז באשטעטיגט געווארן די פלענער אויף א דריי טאגיגע חגיגה ברוב פאר והדר, אנגעהויבן מיט א גייסטרייכע שבת התאחדות "שבת הקהילה", ווען עס וועלן זיך צוזאמקומען אלע תלמידים וחסידים לפונדק אחד, און זיך דערווארעמען אויף א שבת בצוותא חדא בצל הקודש פון כ"ק אדמו"ר מוויען שליט"א.
די גרויסע שבת וועט פארקומען שבת פרשת פקודי שבת החודש, מברכים חודש ניסן און ערב ראש חודש ניסן, די פראכטפולע ארמון האטעל אין קאנעקטיקוט איז ספעציעל ארויסגעדינגען געווארן פאר דעם שבת, און א מאסיווע עסקנות אפאראט גייט אריין אין שוואונג אין די יעצטיגע טעג, צו פארזיכערן אלע דעטאלן על צד היותר טוב.
מוצאי שבת קודש וועט געפראוועט ווערן די חגיגת סיום כתיבת ספר תורה אינאיינעם מיט די צענטראלע סעודת מלוה מלכה, עס וועט אפגעראכטן ווערן דארט אינעם ארמון האטעל מיט לעבעדיגע ריקודין און א גאר רייכע פראגראם.
צומארגנס זונטאג פרשת ויקרא ביום הגדול ראש חודש ניסן, יום שנטל עשר עטרות, וועט פארקומען די חגיגה לכבודה של תורה, ווען די ספר תורה וועט אריינגעפירט ווערן ברוב פאר והדר בקול צהלה ורנה צום ביהמ"ד הגדול דקהל עדת יראים וויען אין וויליאמסבורג, נאכגעפאלגט מיט די סעודת מצוה אין א הערליכע זאל אין שטאט וויליאמסבורג ברוב עם הדרת מלך.
