תלמידי וחסידי וויען גרייטן זיך מיטצולעבן א גאר געהויבענע מסע הקודש וואס כ"ק אדמו"ר מוויען שליט"א נעמט אונטער צו די מקומות הקדושים אין אייראפע, וואס וועט זיין געווידמעט אויסשליסליך פאר די נדיבי לב און תומכים נכבדים, וואס שליסן זיך אן מיט גרויסע סכומים למען החזקת מוסדות הקדושים דחסידי וויען, און קרן הבנינים פון די נייע בניני הישיבה והמוסדות.
אין די יעצטיגע טעג איז פראקלאמירט געווארן די דעטאלן פון די געהויבענע מסע הקודש מיטן נאמען "נחלת הבונים", שטייענדיג דריי יאר זינט דאס לעצטע מאל וואס דער רבי שליט"א האט פוקד געווען די מקומות הקדושים אין אייראפע, די יעצטיגע נסיעה וואס וועט בעז"ה פארקומען קומענדיגן חודש אייר הבעל"ט, וועט זיין קיין פוילין און אונגארן, און דורכאויס די ימי הנסיעה וועט מען פוקד זיין מערערע קברי צדיקים, אין שטאט ליזענסק ביים ציון הק' פונעם הייליגן רבי'ן ר' אלימלך זי"ע, אין שטאט לאנצוהט ביים ציון הק' פון הרה"ק מראפשיץ זי"ע בעל זרע קודש, ביומא דהילולא קדישא י"א אייר, אין קראקא ביים ציון הק' פונעם הייליגן רמ"א זי"ע אין די טעג ארום די יארצייט, און נאך פילע קברי צדיקים אשר מפיהם אנו חיים.
צום הויכפונקט פון די מסע הקודש וועט געפראוועט ווערן א גייסטרייכע שבת בצל הקודש, אין א פראכטפולע האטעל אין שטאט טאקאי אין אונגארן, וואו די נדיבי לב וועלן האבן די זכיה להסב על שולחן המלך און מיטהאלטן דעם שבת כשהמלך בשדה.
אין די קומענדיגע וואכן וועט פארקומען א רייע מסיבות און אסיפות צווישן תלמידי וחסידי וויען, וואו די חברי הקהילה און תומכים נכבדים וועלן זיך אנשליסן אלס שותפים אין די ממלכת התורה, און זוכה זיין צו קענען מיטהאלטן די געהויבענע מאמענטן על אם הדרך.
