צום ענדע פון די ימי השלושים נאך די פלוצלינגדיגע הסתלקות פון כ"ק אדמו"ר הרה"ק מהרי"ד מלעלוב זצ"ל, איז היינט געווארן אויפגענומען אלס ממלא מקום זיין עלטסטן זון, כ"ק הרה"צ רבי ראובן אלטר בידערמאן שליט"א, לכהן פאר אלס אדמו"ר מלעלוב, און ווייטער ממשיך זיין דעם שיינעם הויף בעיר הקודש ירושלים.
ווי באקאנט איז דער לעלובער רבי זצ"ל נסתלק געווארן בפתע פתאום זייענדיג אין מקוה זיך צו מקדש ומטהר זיין, נאכן הסתלקות איז נישט גלייך געווארן אויפגענומען א ממלא מקום, נאר מען האט צוגעווארט א שטיק צייט ביז יעצט ווען עס האט זיך געשלאסן די ימי השלושים.
היינט דאנערשטאג איז פארגעקומען די סעודת השלושים בבית מדרשו פונעם רבי'ן זצ"ל אויף רחוב בר אילן אין ירושלים, וואו עס האבן זיך פארזאמלט פילע חסידים ואנשי מעשה, ובראשם די חשובע קינדער פונעם רבי'ן זצ"ל און די מקורבים. דערביי האט אויפגעטרעטן הגה"צ ר' שמעון שמואל האלבערשטאם שליט"א אבד"ק דברי משה, וועלכער האט מכתיר געווען דעם עלטסטן זון הרה"צ רבי ראובן אלטר בידערמאן שליט"א אלס ממלא מקום באדמורו"ת, ווייטער אנצופירן דעם שיינעם הויף, און משפיע זיין פאר אידישע קינדער תורה וחסידות כיד ה' הטובה עליו.
הגה"צ אבד"ק דברי משה האט אויסגעשמועסט די געוואלדיגע זכות פון ממשיך זיין די הייליגע עבודה און משפיע זיין פאר אידישע קינדער, און ערווענט אז דער גדול האחים וועט ממלא מקום זיין דא אין בית המדרש, און די אנדערע קינדער וועלן אויך ממשיך זיין דעם הייליגן עבודה און משפיע זיין פאר אידישע קינדער וואו אימער, ויענו כל העם יחדיו בברכת מזל טוב.
