אין די יעצטיגע טעג איז געמאלדן געווארן אז כ"ק אדמו"ר מסאטמאר שליט"א וועט אי"ה אונטערנעמען א מסע הקודש צו פוקד זיין די מקומות הקדושים אין אייראפע, לקראת די יומא דהילולא קדישא פון זקינו הגדול דער ראש השלשלת הרה"ק בעל ישמח משה זי"ע, מקום מנוחת קדשו אין שטאט אוהעל אין אונגארן.
די גולת הכותרת פון די מסע הקודש וועט זיין א גרויסע שבת בעיר האבות סיגעט, אינעם היסטארישן שוהל הויף וואו די הייליגע צדיקים שרפי מעלה לבית סיגעט האבן אפגעראכטן די עבודת הקודש און געפירט ריזיגע עדות חסידים לאנגע יארן, וואו עס איז אין די לעצטערע יארן פראכטפול אהערגעשטעלט געווארן א שפאגל נייע בנין בית מקדש מעט און הכנסת אורחים, בנשיאות כ"ק אדמו"ר מסאטמאר שליט"א.
דער רבי שליט"א וועט ארויספארן מיטוואך פרשת מטות מסעי אונטערוועגנס קיין ראמעניע, פון דאנערשטאג אינדערפרי ביז מוצאי שבת קודש וועט דער רבי וויילן אין שטאט סיגעט, פרייטאג פארטאגס וועט פארקומען די צענטראלע עלי' לציון, און דערנאך וועט געפראוועט ווערן א געהויבענע שבת במקהלות עם רב, פילע חסידים וואס וועלן קומען צו פארן פון איבער די גאנצע וועלט.
זונטאג אינדערפרי וועט דער רבי אנקומען צום שטאט אוהעל אין אונגארן, און פוקד זיין דעם ציון הק' פונעם הייליגן ישמח משה זי"ע א טאג נאכן יארצייט וואס געפאלט ביום השבת קודש כ"ח תמוז, דערנאך וועט דער רבי פארזעצן קיין פוילין צו פוקד זיין דעם ציון הק' פון זקינו דער הייליגער צאנזער רב זי"ע בעל דברי חיים.
די נסיעה ווערט צוגעשטעלט דורך די ללכת פירמע, וועלכער וועט מעלדן מער דעטאלן אין די קומענדיגע טעג.
