ברגשי גיל וחדוה האבן תלמידי וחסידי סאטמאר תושבי מאנטריאל אויפגענומען די פרייליכע נייעס, אז צום קומענדיגן שנת הלימודים וועט געעפנט ווערן א אייגענע תלמוד תורה פאר די ילדי חמד נתחנך צו ווערן בדרכי תורה ויראה הברורה, בברכתו ובעידודו פון כ"ק אדמו"ר מסאטמאר שליט"א נשיא הקהילה והמוסדות.
דאס קומט נאכדעם וואס די קהילה האט ביז היינט נישט געהאט א אייגענע חדר פאר די יונגלעך, און פארלאפענע וואך איז פארגעקומען א אסיפה בביתו נאוה קודש פון כ"ק אדמו"ר מסאטמאר שליט"א אין קרית יואל, וואו עס זענען געקומען צו פארן די ראשי הקהילה והמוסדות, אינאיינעם מיט הרה"ג ר' מענדיל ווערצבערגער שליט"א דומ"ץ הקהילה.
ביים אסיפה איז אויסגעשמועסט געווארן פארשידענע ענינים אנבאלאנגט קהילה קדושה ומוסדות התורה דחסידי סאטמאר אין מאנטריאל, און אויפן פלאץ האט דער רבי אויסגעדרוקט רצון קדשו צו מייסד זיין א אייגענע תלמוד תורה, צום נייעם שנת הלימודים תשפ"ה אין א מזל'דיגע שעה.
