ווי באריכטעט מיט עטליכע וואכן צוריק, וועט כ"ק אדמו"ר מסאטמאר שליט"א ארויספארן קומענדיגע וואך אויף א מסע הקודש צו די קברי אבות אין סיגעט און אוהעל, לרגל די יומא דהילולא קדישא פונעם ראש השלשלת דער הייליגער ישמח משה זי"ע וואס געפאלט אויס קומענדיגע וואך שבת קודש פרשת מטות מסעי כ"ח תמוז.
נאכן באשטעטיגן די פונטקליכע דעטאלן פון די נסיעה, איז באשטימט געווארן אז אויפן וועג קיין סיגעט וועט דער רבי זיך אפשטעלן אויף א קורצע באזוך אין שטאט אנטווערפן, מחזק צו זיין קהל עדת חסידיו ומעריציו ותושבי העיר, דער רבי וועט לאנדן אין די אמסטערדאם לופטפעלד דאנערשטאג פארטאגס, און אריינפארן מיטן באן קיין אנטווערפן בעלגיע.
דאנערשטאג דורכ'ן טאג וועט דער רבי זיך אויפהאלטן אין אנטווערפן בקרב חסידיו, דאווענען שחרית בבית מדרשו אינאיינעם מיט די תלמידי הישיבות הקדושות דחסידי סאטמאר, אפרעכטן א מסיבת לחיים און מעמד קבלת פנים, און משמיע זיין דברות קודש ודברי הדרכה פאר די חסידים. אזוי אויך וועט דער רבי באשיינען א רייכע מסיבה לטובת די סאטמארע ישיבה אין אנטווערפן, און פארלערנען א סוגיא שיעור פאר די תלמידי הישיבה בהיכל הישיבה קטנה.
דאנערשטאג שפעט נאכמיטאג וועט דער רבי פארזעצן די נסיעה מיט א פריוואטע פליגער פון אנטווערפן צום שטאט באניא, וואס געפונט זיך נישט ווייט פונעם עיר האבות סיגעט אין ראמעניע, וואו דער רבי וועט פראווענען א געהויבענע שבת אינאיינעם מיט פילע חסידים ואנשי מעשה.
