שטייענדיג שוין עטליכע טעג נאך חמשה עשר באב, ווען כ"ק אדמו"ר מסאטמאר שליט"א האט אנגעהויבן געזעגענען דעם ציבור לקראת די הייליגע טעג די ימים הנוראים הממשמשים ובאים, איז געמאלדן געווארן אין נאמען פון די גבאים משמשים בקודש, אז אנגעהויבן פון קומענדיגן זונטאג וועט איינגעפירט ווערן א נייע סדר, מיט א ספעציעלע שנעלע ליניע פאר די וואס ווילן דורכגיין אויף א שנעלע פארנעם.
דאס קומט נאך וואס אין די לעצטערע יארן האבן טויזענטער חסידים געדארפט ווארטן לאנגע שעה'ן אריינצוגיין אל הקודש פנימה, מיטן בליה און וואוקס בליעה"ר און די גרויסע ציבור וואס וויל אריינגיין לברך ולהתברך בברכת השנים. די נייע סדר ווערט איינגעשטעלט קומענדיגן זונטאג פרשת שופטים ערב ראש חודש אלול, ווען עס וועלן זיין באזונדערע שעות פאר א שנעלע דורכגיין, און באזונדערע שעות פאר געווענליכע קבלת קהל.
דער רבי וועט אויפנעמען זונטאג, מאנטאג, מיטוואך און דאנערשטאג, פאר די קומענדיגע וואכן בימי חודש אלול, בביתו נאוה קודש אויף אוהעל קאורט. יעדן טאג פון פינף דרייסיג ביז זיבן אזייגער וועט זיין געווידמעט פאר שנעלע קוויטלעך, נאר מענער אין א נאכאנאנדע שורה איינער נאכן צווייטן, און שפעטער ביינאכט פון אכט ביז צען דרייסיג וועט זיין די געווענליכע קבלת קהל, חסידים מיט די משפחות, שאלות און הזכרות, עלטערע אידן און אזוי ווייטער.
יעדן דינסטאג וועט דער רבי ווי געווענליך אויפנעמען דעם ציבור אין וויליאמסבורג, און זונטאג פרשת כי תצא ו' אלול וועט דער רבי אויפנעמען דעם ציבור בבית מדרשו אין מאנסי, בעפאר די יארצייט טיש לרגל די הילולא קדישא פון זקינו הרה"ק בעל ייטב לב זי"ע, וואס קומט פאר יאר יערליך אין סאטמארער בית המדרש אין מאנסי.
