דעם דאנערשטאג נאכט ביים יארצייט טיש אין ביהמ"ד הגדול אין קרית יואל, האט כ"ק אדמו"ר מסאטמאר שליט"א געמאלדן די איבערראשנדע נייעס ארויסצוהעלפן די הרחבת גבולי הקדושה אין קרית יואל, מיטן פראקלאמירן א מאסיווער טויש אינערהאלב די קרית יואל'ע דירות מארקעט, וואס וועט גענצליך אפשטעלן דעם קריזיס וואס האט געהערשט אינעם שטאט ביז היינט צוטאגס ווען דעוועלאפערס האבן פארלאנגט אסטראנאמישע סומעס פאר א דירה אין קרית יואל.
אונטער דעם מאסיווע מעלדונג איז די נייע מארקעט פרייז פון א דירה אין קרית יואל געווארן באשטימט פאר אזוי ביליג ווי $300 פער סקווער פיס, אויב מען קויפט דעם הויז כדאי צו וואוינען דערין.
דערביי האט דער רבי געמאלדן איבער אזויפיל ווי צוויי טויזנט דירות וואס וועלן אצינד געבויעט ווערן פאר די תושבי העיר צו ווערן פארקויפט פאר דעם ביליגער פרייז. ערשטנס האט דער רבי דערמאנט נדבת לבו הטוב פון הנגיד החסיד ר' עקיבא הערש קליין הי"ו, וועלכער שטעלט זיך לימין כ"ק אדמו"ר מסאטמאר שליט"א , און ער האט דראסטיש גענידערט די פרייזן פון דעם צווייטער פאזע פון שכונות ויואל משה און וועט בעטן בלויז $300 פער סקווער פיס פאר אזעלכע וואס קויפן די הייזער כדאי צו וואוינען דערין. דערנאך האט די רבי צוגעלייגט איבער א שטח פונעם וועד הקריה וואו עס וועט אויפגעבויעט ווערן נאך טויזנט דירות פאר דעם גאר ביליגער פרייז.
צום לעצט האט דער רבי געמאלדן אז די ווילעדזש באאמטע האבן איינגעשטעלט א גענצליכע מאראטארים אויף דירות פערמיטן, און זיי וועלן בלויז שענקן פרישע פערמיטס פאר אזעלכע בעלי בתים וואס וועלן פארקויפן די דירות פאר דעם צוגענגליכענעם פרייז, און דערצחו ערמעגליכן פאר דעם דורכשניטליכער אינגערמאןן און בעל הבית זיך צו קענען איינהאנדלען א אייגענע דירה מיט הרחבת הדעת.
