אין בעפארברייטונג צו די ימים הנוראים הבאים עלינו לטובה, איז געמאלדן געווארן מטעם קהל יטב לב ד'סאטמאר אין וויליאמסבורג, אז היי יאר וועט אויפגעבויעט ווערן א ריזן שאטער פארנט פונעם גרויסן בית המדרש אויף הופפער סטריט, אויפן גאס צווישן די בנין ביהמ"ד און בנין חי"ל הילמאן וואס דינט אויך פאר די צרכי הקהילה, צו קענען אקאמאדירן דעם ריזן ציבור וואס באלאגערט די ביהמ"ד מדי מועד במועדו.
די גאנצע מערב וואנט פון ביהמ"ד וועט ווערן אראפגענומען, און די גרויסע שאטער וועט זיין א טייל פונעם גרויסן היכל ביהמ"ד, צוברענגענדיג גאנצע טויזענט זיצן וואס איז נישט געווען ביז יעצט, עס וועט ווערן אויפגעשטעלט בעפאר ראש השנה די חסידים זאלן קענען מיטהאלטן די תפילות אינאיינעם מיט הגה"צ אבד"ק סאטמאר וויליאמסבורג שליט"א, און בפרט אויף יום הקדוש ווען כ"ק אדמו"ר מסאטמאר שליט"א וועט ווי יאר יערליך פראווענען די עבודת היום בקרב חסידיו אין שטאט וויליאמסבורג אין אט דעם מקום קדוש.
נאך יום הקדוש וועט מען אראפנעמען די דאך פונעם שאטער און עס פארוואנדלען אין א גרויסע סוכה, וואו עס וועט געפראוועט ווערן די געהויבענע מעמדי החג און שולחנות הטהורות ברוב עם הדרת מלך.
