תלמידי וחסידי סאטמאר אין וויליאמסבורג גרייטן זיך אויף א גאר געהויבענע שבת פון הרחבת גבולי הקדושה, ווען דעם שבת קודש פרשת נצבים וילך שבת סליחות, וועט מען אין א מזל'דיגע שעה באנייען דעם גרויסן הערליכן נייעם בית המדרש דקהל יטב לב ד'סאטמאר שכונת גערי טרופ, וואס איז ערווארטעט אויסצושטייגן אלס א תל תלפיות פאר די גאנצע אומגעגנט, איבערהויפט פאר תלמידי וחסידי סאטמאר תושבי השכונה.
די בית המדרש איז געבויעט געווארן דורכאויס די לעצטע יאר מיט העפטיגע ארבעט, און אצינד צום גמר הבניה ווען דעם שבת קומט פאר די פתיחת בית המדרש, וועט כ"ק אדמו"ר מסאטמאר שליט"א ערשיינען בהדרו צו די תפילות שבת אינדערפרי ברוב עם הדרת מלך, נאכן דאווענען וועט פארקומען א גרויסע קידוש לכבוד די חנוכת הבית, און דערנאך וועלן הונדערטער חסידים צוריק באגלייטן דעם רבי'ן לביתו נאוה קודש אויף בעדפארד.
פרייטאג נאכמיטאג איינס אזייגער וועט פארקומען די מעמד קביעת מזוזה ביים נייעם בית המדרש אין שפיץ פון כ"ק אדמו"ר מסאטמאר שליט"א, דערביי וועט אויך געגעבן ווערן די געלעגנהייט פאר די נדיבים בוני הבית צו קלאפן א מזוזה אינעם בנין.
