מטעם בית כ"ק אדמו"ר מסאטמאר שליט"א איז באשטעטיגט געווארן אז די קומענדיגע וואך דינסטאג וועט דער רבי ארויספארן אויף א בליץ נסיעה קיין סאוט אמעריקע, און אפשטאטן א קורצע ביקור חיזוק אין די אידישע קהילה אין בוענאס איירעס ארגענטינא.
דער רבי שליט"א פארט ארויס קיין סאוט אמעריקע צו א ערשטמאליגע באזוך אין די מהודר'דיגע בית השחיטה פון מיעל מארט וואס געפונט זיך אין אורוגוואי, און שטעלט צו די גסות פלייש פאר די השגחה פון קהל יטב לב ד'סאטמאר. ווי באקאנט שטייט דער רבי פערזענליך אין שפיץ פון די מאסיווע השגחה אפאראט פון די סאטמארע קהילה, און פארט כסדר איבער די וועלט צו זעהן פונדערנאנט די אלע פירמעס און אלע הידורים וואס ווערט צוגעשטעלט.
אצינד וועט דער רבי גרייט זיך ארויסצופארן קיין אורוגוואי, האט דער רבי אויסגעדרוקט רצון קדשו צו אפשטאטן א קורצע באזוך אין בוענאס איירעס ארגענטינא, און מחזק זיין די ארטיגע אידישע קהילה, וואס איז ווי באקאנט אוועקגעשטעלט געווארן דורך כ"ק הרה"ק מסאטמאר זי"ע וועלכער האט זיך מוסר נפש געווען דערפאר יארן לאנג.
אין ראם פון די קורצע באזוך אין בוענאס איירעס וועט דער רבי דאווענען שחרית דינסטאג צופרי אין גרויסן ביהמ"ד, דערנאך וועט פארקומען א מעמד קבלת פנים מיט די באטייליגונג פון הונדערטער תושבי העיר, און דערנאך וועט דער רבי אויפנעמען די ארטיגע אידן לעצה ולברכה.
