מיט פרייד פון הרחבת גבולי הקדושה האבן אלפי תלמידי וחסידי סאטמאר ערהאלטן די בשורה אז די הנהלה פון ישיבה דרך התורה ד'סאטמאר האט אין א מזל'דיגע שעה מצליח געווען צו גומר זיין די מקח אויף א גיגאנטישע שטח רחבת ידים אין שטאט קארנוואל אין ניו יארק, וואו עס וועט אויפגעבויעט ווערן צוויי פראכטפולע בנינים אלס אכסניא של תורה פאר די ישיבה הקדושה.
די ישיבה דרך התורה ד'סאטמאר וועלכער איז געגרינדעט געווארן דורכ'ן ראש ישיבה הגה"צ אבד"ק סאטמאר וומס"ב שליט"א, בנשיאות אביו הגדול כ"ק אדמו"ר מסאטמאר שליט"א, איז ספעציעל אהערגעשטעלט געווארן פאר די טייערע בחורים וואס ווילן גולה זיין למקום תורה, אין א פולשטענדיגע ישיבה מיט א דארמיטארי וואו צו שטייגן בתורה ועבודה אויף א שטארקע פארנעם.
אין די לעצטע פאר יאר זינט די גרינדונג פון די ישיבה, איז די כתר שם טוב געשטיגן גאר שטארק און די תלמידים זענען זיך משתעשע באהלה של תורה, ווען די צאל תלמידים וואקסט כסדר. די נויט אהערצושטעלן א אייגענע אכסניא האט זיך גאר שטארק אנגעזעהן, און דורכאויס די לעצטע פאר חדשים האט מען עוסק געווען אפצוקויפן דעם נייעם שטח אין קארנוואל, וואס געפונט זיך נעבן די האדסאן ריווער, בלויז צוואנציג מינוט צו פארן פון קרית יואל.
פארלאפענע וואך האט מען בברכתו ובעידודו פונעם נשיא הישיבה כ"ק אדמו"ר מסאטמאר שליט"א גומר געווען די מקח אויף די הערליכע שטח, וואו עס וועט בקרוב ווערן אויפגעבויעט צוויי גרויסע בנינים אדירים לצרכי הישיבה לשם ולתפארת.
