לאנגע שעות פון קורת רוח אין א תורה'דיגער אטמאספערע האט ארומגענומען טויזנטער סאטמארער חסידים דעם זונטאג, ווען מען האט מיטגעלעבט די פרייליכע מאמענטן פון דערגרייכונג, ווען עס איז געפראוועט געווארן דער לאנג ערווארטעטער מעמד סיום הש"ס וואס איז געלערנט געווארן דורך טויזנטער חסידים אין ראם פונעם סדר לימוד "תורתך שעשועי" שעל ידי קהל יטב לב דסאטמאר.
דער סיום הש"ס איז געקומען נאך צוועלף יאר פון התמדה ויגיעה בתורה, ווען די חברי החבורה האבן געהארעוועט אין לערנען א בלאט גמרא א טאג, און זוכה געווען לברך על המוגמר מיט לימוד און חזרה, באגלייט מיט בחינות יעדע פאר וואכן. דער גרויסער טאג איז שוין באשטימט געווארן מיט לאנגע חדשים צוריק, און אזוי האט מען זיך געגרייט מיט אייפער און הכנה כראוי וכיאות לכבודה של תורה.
די גרויסארטיגע חגיגה איז געפראוועט געווארן אין דעם גיגאנטישן קאמפלעקס פון RCC אין מאנסי, וואס איז אין די ערשטע פאר שעה געווען אויסגעשטעלט אלס א פולקאמער בית המדרש וואו דער טויזנט קעפיגער ציבור האט געהארעוועט אין לערנען און מסיים געווען גאנץ ש"ס, אין שפיץ פונעם מנהיג העדה ונשיא החבורה כ"ק אדמו"ר מסאטמאר שליט"א.
שפעטער אין טאג איז פארגעקומען דער פראכטפולער מעמד סיום הש"ס וואס איז געווען צוגערישט גאר הערליך און עלעגאנט, ווען די געטרייע עסקנים שטעלן אהער יעדע איינציגע דעטאל זאל קלאפן אויפ'ן שענסטן און בעסטן מיט אלעס וואס פעלט זיך אויס ארום און ארום.
אלס יושב ראש האט אויפגעטראטן הרה"ג ר' שלמה שבתי קעסטענבוים שליט"א, און דערנאך האבן גערעדט עטליכע אידן וועלכע האבן אליין מסיים געווען ש"ס.
דער בארימטער בעל מנגן ר' ישראל אדלער הי"ו פון ארץ ישראל האט עלעקטעריזירט די מאסן מיט הארציגע מעלאדיעס און חזנות און גראמען, מען האט געהערט דברי ברכה פון הגה"צ ר' יעקב מאיר שעכטער שליט"א און פון כ"ק אדמו"ר מתולדות אהרן שליט"א, און דאן האט מען געהערט א דרשה פונעם פטרון החבורה הרב יצחק שווארץ הי"ו.
דאן איז מען צוגעטראטן צום הויכפונקט ווען כ"ק אדמו"ר מסאטמאר שליט"א האט אויפגעטראטן מיט דברות קודש און ארומגערעדט איבער פארשידענע ענינים הצריכים חיזוק און דברים העומדים על הפרק. מען האט געהערט דברות קודש פונעם פוסק הדור מרא דארעא קדישא שליט"א, און א דרשה פון הגה"צ המשפיע ר' יוסף חיים גרינוואלד שליט"א.
נאכ'ן סיום האט מען זיך ארויסגעלאזט אין פייערליכע ריקודין לשמחת התורה, און מען האט געהערט ווערטער פונעם משמש בקודש הרב חיים שלמה פישער הי"ו, און די דרשה פונעם נואם הכבוד הרה"ג ר' אפרים וואקסמאן שליט"א ראש ישיבת מאור יצחק.
