אין די יעצטיגע טעג איז באשטעטיגט געווארן די פלענער איבער א גרויסע מעמד שחיטת הכבש, וואס וועט פארקומען דעם חודש מנחם אב בחצר הקודש סערדאהעלי, שטייענדיג עטליכע חדשים נאך וואס כ"ק אדמו"ר מסערדאהעלי שליט"א האט ערהאלטן א שעפעלע במתנת כהונה, ביים גרויסן מעמד פדיון פטר חמור דורך כ"ק אדמו"ר מסאטמאר שליט"א.
ווי באקאנט איז פארגאנגענעם חול המועד פסח פארגעקומען א היסטארישע מאורע בחצר הקודש סאטמאר, ווען כ"ק אדמו"ר מסאטמאר שליט"א האט מקיים געווען די זעלטענע מצוה פון פדיון פטר חמור, אויף צוויי אייזלען וואס זענען געבוירן געווארן אלס בכור אונטערן רבינ'ס אייגענטום, די מעמד איז פארגעקומען אין ביהמ"ד הגדול אין קרית יואל, ווען אלס כהן הפודה פאר איין חמור איז געווען כ"ק אדמו"ר מסערדאהעלי שליט"א, און פארן אנדערן חמור הגה"צ ר' בנציון שטראססער שליט"א אבד"ק נייטרא ב"פ.
צומארגנס ערב שביעי של פסח איז פארגעקומען די מעמד שחיטת הכבש פאר די שעפעלע וואס איז געשאנקען געווארן פאר הגה"צ אבד"ק נייטרא שליט"א, די מעמד איז פארגעקומען אויף א פריוואטע פארנעם אין קרית יואל, מיט די באטייליגונג פון כ"ק אדמו"ר מסאטמאר שליט"א, און דערנאך האט מען אפגעשיקט די פלייש פארן כהן הפודה דער נייטרא רב.
אצינד איז באשטעטיגט געווארן די פלענער אויף די מעמד שחיטת הכבש, פארן שעפעלע וואס איז געשאנקען געווארן פאר כ"ק אדמו"ר מסערדאהעלי שליט"א, די מעמד וועט פארקומען אויף א גרויסע פארנעם אין מחנה ישיבת סערדאהעלי אין מאנטיסעלא, דעם קומענדיגן זונטאג פרשת עקב ט"ז אב, במעמד קהל רב חסידים ואנשי מעשה.
