ווי יעדע שטיק צייט איז כ"ק אדמו"ר מסאטמאר שליט"א ארויסגעפארן צום אמעריקאנעם סטעיט אייאווע וואו עס געפונט זיך די גרויסע שלאכט הויז וואו די סאטמארע שחיטה איז אקטיוו אהערצושטעלן כשר פלייש פאר אידישע קינדער, צו זיך אומקוקן פונדערנאנט אויף די תהליך השחיטה און געבן די השגחה כדת וכדין.
דער רבי שליט"א וועלכער האט זיך אויפגעהאלטן אין די יעצטיגע וואכן אין בעטלהעם ניו העמפשער אויף אפרוה, איז ארויסגעפארן פארגאנגענע וואך דינסטאג מיט א פריוואטע פליגער קיין אייאווע, און פאר פיר שעה נאכאנאנד ארומשפאצירט צווישן אלע אפטיילונגען אין די בית השחיטה, באטראכט אלע חומרות און הידורים און געזעהן ווי אלעס ווערט געפירט לויט די קלארע הוראות פון די סאטמארע דיינים און דעם רבי'ן זעלבסט, וועלכער איז אקטיוו בעובי הקורה צו מפקח זיין על משמר הכשרות.
אויפן ארט זענען געווען אנוועזנד מיטן רבי'ן דער רב המכשיר פון די בית השחיטה הגה"צ אבד"ק נייטרא מאנסי שליט"א, הגה"צ אבד"ק סאטמאר מאנסי שליט"א, הגה"צ ר' אפרים שמעון לייכטאג שליט"א מדייני סאטמאר אין בארא פארק, און דעם רבינ'ס זון הגה"צ ר' חיים הערש טייטלבוים שליט"א אבד"ק סיגוט. דער רבי האט באטראכט מיט מתינות אלע אפטיילונגען באזונדער, באקוקט די חלפים פון די שוחטים, און פערזענליך געשטאנען על המשמר ביי די גאנצע הילוך השחיטה ניקור און ביקור. נאכן באזוך האט דער רבי באזוכט אין בית המדרש פון די שוחטים, און זיך אריינגעלאזט אין א טיפע הלכה שמועס איבער פארשידענע ענינים אין דעם געביט.
