אין א פרעצעדענטלאזע שריט פון הרחבת גבולי הקדושה ווערט געמאלדן היינט, אז די הנהלה פון מוסדות סאטמאר אין בארא פארק איז אריין אין קאנטראקט אפצוקויפן א נייע גיגאנטישע שטח ביים עק פון די היימישע געגנט אין בארא פארק, וואו עס וועט ווערן אויפגעבויעט א נייע גיגאנטישע בנין פאר די סאטמארע תלמוד תורה, אלס אכסניא של תורה מחנך צו זיין די קומענדיגע דורות על דרך ישראל סבא.
די רעדע איז פון די גרויסע שטח אויף בעי פארקוועי, די גאנצע ברייט פון די ניין און פופציגסטע סטריט ביז די זעכציגסטע סטריט, וואו עס געפונט זיך די רייט עיד פארמאסי געביידע. די מקח וואס קאסט אפ דרייצן מיליאן דאללער, וועט אריינציען אין א מאסיווע פראיעקט פון צענדליגע מיליאנען אויפצובויען א גיגאנטישע געביידע וואס וועט ארייננעמען הונדערט קלאס צימערן, בתי מדרשים און עס זאלן, צו קענען אקאמאדירן דעם ריזן ציפער פון צוויי און א האלב טויזענט תלמידי המוסדות.
אזוי אויך ווערט געפלאנט אהערצושטעלן אין די נייע געביידע עטליכע שמחה זאלן, אריינגערעכנט א נייע חתונה זאל צו קענען פראווענען אידישע שמחות מיט גרויס פרייד און הרחבת הדעת. דער בריח התיכון פונעם פראיעקט איז הנגיד החסיד ר' ליפא פריעדמאן הי"ו מראשי הנדיבים אין סאטמאר, און בפרט פאר די סאטמארע מוסדות אין בארא פארק.
