בחצר הקודש סאטמאר גרייט מען זיך ווידער אויף א גרויסארטיגע מעמד כבוד התורה, שטייענדיג בלויז עטליכע חדשים נאך די היסטארישע מעמד סיום הש"ס וואס איז געלערנט געווארן דורך טויזענטער חסידים במסגרת הלימוד תורתך שעשועי דחסידי סאטמאר, אצינד גרייט מען זיך אויף א מעמד כבוד התורה וואס וועט צונויפזאמלען די טויזענטער חסידים וואס זענען אנגעשלאסן אין די חבורה "יסודי התורה" דחסידי סאטמאר.
ביידע חבורות "יסודי התורה" און "תורתך שעשועי" נעמען אויף דעם אויבן אן ביי סאטמארע חסידים, די חבורה "יסודי התורה" איז געגרינדעט געווארן מיט קרוב צו צוואנציג יאר צוריק, געאייגענט פאר די חסידים וואס זענען קובע עתים לתורה צו לערנען א עמוד א טאג, א סך הכל פון צען בלאט א חודש. עטליכע יאר דערויף האט כ"ק אדמו"ר מסאטמאר שליט"א געגרינדעט די צווייטע חבורה "תורתך שעשועי" פאר די חסידים וואס זענען קובע עתים לתורה צו לערנען א בלאט א טאג, א סך הכל פון צוואנציג בלאט א חודש, און עטליכע חדשים צוריק האט מען טאקע געענדיגט גאנץ ש"ס אין דעם מחזור.
אינערהאלב חבורת הלימוד "יסודי התורה" איז מען מסיים אצינד די ערשטע האלב ש"ס, מיטן סיום מסכת קידושין און גאנץ סדר מועד, און מען גרייט זיך שוין אריינצוגיין אין די צווייטע האלב פון ש"ס מיט א פרישקייט, צו דעם מאמענט וועט געפייערט ווערן די גרויסארטיגע מעמד "כינוס הלומדים", וואס וועט צונויפברענגען די טויזענטער חסידים וואס זענען אנגעשלאסן אין די חבורה אויף א געמיינזאמער כינוס חיזוק.
די גרויסע מעמד איז באשטימט אויף קומענדיגן זונטאג פרשת לך לך, און עס וועט פארקומען אין די גיגאנטישע קאלאהארי צענטער אין די פאקאנאס בערג אין פענסילוועניע, וואו די לומדים וועלן פארוויילן צווישן די בערג צו עוסק זיין בתורה, נעמען די בחינה ברוב עם, און מיטהאלטן דעם גרויסן מעמד.
די רעגיסטראציע האט זיך געעפנט דעם זונטאג, און אין בלויז עטליכע שעה איז שוין פארקויפט געווארן רובא דרובא פון די רעזערווירטע פלעצער.
א גאר רייכע פראגראם ווערט צוגעגרייט מיט מייסטערהאפטיגע דרשות, ובראשם די צענטראלע דברות קודש פון כ"ק אדמו"ר מסאטמאר שליט"א נשיא ומייסד החבורה, בעפאר די מעמד וועט פארקומען א ספעציעלע סדר לימוד ברוב עם הדרת מלך, און פילע דעטאלן ווערן אויסגעארבעט ארויפצוהייבן דעם הייליגן חבורה אויף א העכערע ניווא.
אין די זעלבע צייט איז אויך נתייסד געווארן א פרישע רינגעלע אין די סאטמארע חבורה "תורתך שעשועי", מיטן אנהייב פון א סדר לימוד אין "תלמוד ירושלמי", אנגעהויבן מיט מסכת שבת אין סדר מועד וואס ווערט יעצט געלערנט אין חבורת תורתך שעשועי, די נייע סדר לימוד האט זיך אנגעהויבן היינטיגן מאנטאג פרשת נח כ"ח תשרי, מיט א סדר לימוד פון דריי בלאט א וואך, צו לערנען פאראלעל מיטן סדר לימוד פון תלמוד בבלי.
